“Isté 2020. Nos fajun para”
Invit por le volontariat pro l’assistënza da d’isté de mituns y jogn
La situaziun atuala y i bojëgns familiars plü desvalís che é chersciüs tratan chësc tëmp de crisa se damana ince na reprogramaziun di sorvisc de assistënza da d’isté te nosta provinzia.
I assessurs por l’istruziun y la formaziun Philipp Achammer y Daniel Alfreider ó dé n sëgn de solidarieté ales families y invié dötes les colaboradësses y i colaboradus tl ciamp dla scora todëscia y ladina da ofrí n sorvisc de laur volontar en ocajiun dles ofertes ordinares de assistënza da d’isté.
I chiriun personal pedagogich dles scolines, insegnanc de vigni livel scolastich, colaboradësses y colaboradus por l’integraziun y pedagoghes y pedagogs soziai che te chësta situaziun d’emergënza se mët a desposiziun por n tëmp tederminé por n sorvisc a nosta sozieté.
Chësc contribut individual de solidarieté vëgn pité defora dal report de laur, zënza degun dërt de retribuziun o d’atri paiamënc. Dal punt d’odüda dl dërt dl laur, do che chësc é gnü tlarí dala Repartiziun personal y dales Intendënzes, n’él debojëgn de degügn d’atri vari d’aprovaziun, deache al se trata de n sorvisc debann che i dependënc provinziai dles sclines o dles scores (maestres dla scolina, personal pedagogich, colaboradësses y colaboradus por l’integraziun, pedagoghes y pedagogs soziai) ofrësc a n “terzo datur de laur”. L’assiguraziun mëss gní surantuta dal’assoziaziun che mët a jí le sorvisc.
Formular
Scrí fora le formular sot al link dessot y dá dant tüa desponibilité. Te tüa comunicaziun mët ite prëibel ince le paisc o le comun olache i oresses tó sö le sorvisc. Chësta lista gnará tres indô ajornada y metüda a desposiziun ii comuns deplü iadi al’edema. Chisc se metará a öna cun les assoziaziuns che organisëia sorvisc de assistënza da d’isté y te contatará sce al è debojëgn.
Por ti dé la poscibilité ales assoziaziuns de s’organisé le plü debota che ara vá, él important che te comunichëies tüa desponibilité cina ai 5 de jügn 2020. Le formular indere restará davert ince do chësta data, le plü tert cina ai 16 de jügn 2020.
I responsabli dl’istruziun y formaziun te dij dilan danfora por tüa desponibilité y ai è sigüsc che te tëmps sciöche chisc el plü important co zënza da mëte i mituns y i jogn tl zënter dla sozieté.
Le link al formular de registraziun sará atif dai 29 de ma inant.
Por les studëntes y i studënc dla Facolté de Sciënzes dla Formaziun
Por incentivé i studënc dla Facolté de Sciënzes dla Formaziun da lauré d’isté tl ciamp dl assistënza da d’isté, á le consëi dl curs de stüde tut la dezijiun da reconësce y mëte ite chësta esperiënza de laur (paiada o nia paiada) tl diploma supplement.
Stüdieste pro la Facolté de Sciënes dla Formaziun a Porsenú?
- Te sal bel da lauré cun mituns y jogn?
- Te savessel bel da fá esperiënza te chësc ciamp?
- Y tl medemo momënt da fá val por tü stüdi?
- Spo tol ince tö pert. Tö por Südtirol!
Contatëia to comun o diretamënter l’assoziaziun che organisëia i sorvisc de assistënza da d’isté y dá dant tüa desponibilité da colaboré. Te podaras fá reconësce chësta esperiënza de laur te to diploma supplement, desmostran insciö dötes les perts de tüa esperiënza.
- Co funzionëiel pa?
Damana do n atestat pro l’assoziaziun che organisëia le sorvisc olache te saras atif/ativa. Te pos le dé jö adöm cun la domanda de reconoscimënt dles esperiënzes de laur y de registraziun tl “diploma supplement” pro i responsabli dl ofize practicums dl consëi de curs de stüde.
Insciö fejeste ince tö para: por te y por Südtirol!
