1. Home
  2. Focus solidarieté

Focus solidarieté

N ucajion dl Di dl’Autonomia uel la Provinzia nfurmé la zitadines y i zitadins sun la tematica autonomia y solidarietà, sun l senificat dl’azions de solidarietà y sun la truepa sortes de scumenciadives de cooperazion purtedes inant sun dut l mond. Tla chëurt dedite dl Palais Widmann sarà la solidarietà donca l argumënt zentrel y l ti unirà dedicà stonc de nfurmazion aldò de chësta pruspetives:

Dodesc istituzions y assoziazions se prejentea dala 10.00 ala 18.00 cun stonc de nfurmazion. Tlo dessot abinëis na panoramica dla urganisazions che tol pert al Di dl’Autonomia y dla solidarietà.

 

  • Ulentariat y proiec de svilup
    Provinzia de Bulsan – Ufize Cuestions de cabinet

    L Ufize Cuestions de cabinet se dà ju cun proiec defrënc dl raion soziel a livel local y internaziunel. Al di dl’Autonomia uniral prejentà danmesdì l’ativiteies de cooperazion dla Provinzia tl Nepal. Ernst Preyer rujenerà de “Pro Nepal”, n proiet a sustëni dla populazion dl Nepal cun mesures de svilup y programs d’aiut mirei. dala 12.30 inant se cunzentreran sun i servijes de ulentariat, danter chisc p.ej. l servisc zevil provinziel o l servisc ulenter d’instà per i jëuni y la jëunes. Dala 15.00 prejenterà n valguna lies de ulentariatsi lëur. L Ufize Cuestions de cabinet ie nluegià sot ala Presidënza y l se dà ju cun duta l’ativiteies liedes ala cooperazion per l svilup, ai servijes ulenteres y ala urganisazions de promozion soziela, ma nce de scunanza dl lingaz dla oma y dla grupes linguistiches, la scunanza di/dla cunsumadëures y mo auter.

    De plu nfurmazions: Ufize Cuestions de cabinet

  • Cooperazion per l svilup
    Provinzia de Bulsan - Ufize Cuestions de cabinet

    La cooperazion per l Svilup dla Provinza autonoma de Bulsan sustën proiec y ntervënc d’emergënza te paejes tl lëur de svilup y chersciuda. N l Di dl’Autonomia saral prejënc nchin dala 12.30 i Dutores dl Südtirol per l Mond. Chësta urganisazion ie unida metuda su da dutores per sustenì la populazion te teritoresc pueresc o te na situazion de emergënza y per mëter a despusizion aiuc medics. Dala 12.30 ala 15.00 ti tucherala ala Lia Beppe y Rossana Mantovan, che giapa l sustëni dla Provinzia per proiec dejëuc tla India y tla Tunisia. A pië via dala 15.00 contai/la ulenteres dl’assoziazion Judé zënza cunfins de si mpëni tl ciamp dla furmazion. Ora che pité n cuntribut al cumbatimënt contra la puertà y al svilup sustenibl se dà la cooperazion per l svilup nce ju cun l’educazion al svilup y ala mondanità tl Südtirol.

    De plu nfurmazions: Cooperazion per l svilup

     

  • Educazion al svilup y ala mondanità
    Provinzia de Bulsan - Ufize Cuestions de cabinet

    Pra la cooperazion per l svilup tochel nce l’educazion zivica y ala mondanità tl Südtirol. Perchël sarà pra l Di dl’Autonomia  nce presëntes la Butëighes dl Mond dl Südtirol. Te duta la provinzia iel 10 butëighes dl mond che sustën l cumerzgiust y solidal. A pië via dala 12.30 puderan se devertì  cun l quiz dla Urganisazion per n mond solidal (oew). Nce la revista Zebra sarà prejënta pra l stont. Dala 15.00 ala 18.00 cunterà la Biblioteca Cultures dl Mond, l’Assoziazion per i populi mamancei y Operation Daywork de si lëur tl mond dla cooperazion.
    Ora che chisc proiec sun l’educazion al svilup, ala pesc y ala mondanità urganisea la cooperazion per l svilup dla Provinzia nce scumenciadives y ancuntedes de furmazion sun chësta tematiches.

    De plu nfurmazions: Educazion al svilup y ala mondanità

     

  • Servijes ulenteres
    Provinzia de Bulsan - Ufize Cuestions de cabinet

    La Provinzia coordinea y sustën truep servijes ulenteres. N valguni ie prjënc cun stonc metui su n ucajion dl Di dl’Autonomia. Nchin dala 12.30 purterà la Crëusc Blancia dant si atività: plu che 3.100 ulenteres fej n servisc priejà per la populazion dl Südtirol. Do la 12.30 se prejenterà la Lia Volontarius. Si ulenterespieta n cuntribut de valor al svilup dla cumenanza judan persones che viv sun streda. Ala fin prejenterà la Caritas dla Diozesa de Bulsan-Persenon dala 15.00 n valgunes de si ativiteies tl Südtirol.

    De plu nfurmazions: Servijes ulenteres

  • Assoziazions de ulentariat
    Provinzia de Bulsan - Ufize Cuestions de cabinet

    Tl Südtirol iel registrà 2300 assoziazions de ulentariat. N valgunes de chëstes se prejentea pra l Di dl’Autonomia. Dala 10.00 ala 12.30 tlarirà l Socors alpin co judé persones ruvedes te situazions de pericul te lueges nia azessibles. Domesdì abenëura sarà la Union Provinziela di Studafuech ulenteres a despusizion dl publich nchin la 15.00. Chësta lia ie unida metuda su tl 1955 y sustën truep studafuech ulenteres ti paejes cun furmazion, assistënza tecnica y aministrativa. Dala 15.00 iel lerch per i mëndri cun l VKE che cunterà ciuldì che l ie tan de mpurtanza realisé sperses per juesc per i pitli.

    De plu nfurmazions: Portal dl ulentariat

  • Sostëgn de jënt atempada
    Assoziaziun: “AUSER – Ass. per l'autogestione dei servizi e la solidarietà” (AUSER - Ass. por l'autogestiun di sorvisc y la solidarieté)

    L’AUSER é n’assoziaziun de volontariat y de sostëgn sozial che se tol dant da tigní sö vigni forma d’esclujiun soziala, da mioré la cualité de vita, da slarié fora la cultura y la solidarieté, ajache vigni eté á n valur y vigni porsona n so proiet de vita tres chël che ara vá da deventé na ressursa por se y i atri.
    Le Zënter AUSER é gnü metü sö dl 1993 sön scomenciadia de rapresentanc dla Cgil-Agb y pita consulënza y aiüt y les porsones vëgn ascutades sö tres le sorvisc „Fi d‘arjënt”, che sostëgn aziuns de bona vijinanza y d’intervënt surapró al‘assistënza a ciasa. Implü vëgnel ince pité le „Telefon d‘arjënt” por ascuté so porsones che se sënt sores.

    Contac:
    Tel.: 0471 20 05 88
    E-mail: presidenza@auserbz.org
    Web: http://www.auserbz.org

  • Porsones cun handicap
    Assoziaziun: A.I.A.S. Onlus Balsan

    L’AIAS Onlus Balsan é n’assoziaziun che é gnüda metüda sö dl 1966 por orenté de n valgönes families cun mituns cun handicap. Da passa 50 agn fejera n laur important a bëgn de porsones cun handicap y sostëgn sües families, pitan dantadöt ativités por le tëmp lëde, sostëgn y sensibilisisaziun sön la desvalianza: sojornanzes al mer y jites tl tëmp lëde, laboratori cun tecnologies nöies, ativités tl tëmp lëde, ativités musicales y d’avijinamënt al monn di tiers por stimolé l’autonomia y la creativité. Por i plü jogn vëgnel organisé n doscora spezial por i desturbs spezifics d’aprendimënt (DSA) y defizit d’atenziun/iperativité (ADHD). La biblioteca “Oltre l’Handicap” promöi da 25 agn incá na cultura che reconësc le valur dla desvalianza y dl’inclujiun y ó fá a na moda che “düc” pois lí. Ara á zirca 7.500 tesć, dlungia a DVD, software didatics y compensatifs, audiolibri, ressurses sides por talian co por todësch.

    Contac:
    Tel.: 0471 20 44 76 (Petra) 
    E-mail: info@aias-bz.it
    Web: http://aiasbolzano.it

  • Sanité psichica
    Assoziaziun: “Ariadne – per la salute psichica, bene di tutti” (Ariadne – por la sanité psichica, bëgn de düc)

    L’Assoziaziun Ariadne (ex Assoziaziun Parënc y Amisc de porsones cun maraties psichiches) é gnüda metüda sö dl 1989 ajache al nen jô debojëgn y les families olache al viô porsones cun problems psichics savô da mëssei s’ativé concretamënter por che i interlocuturs politics ascutass sö les domandes da na majera prescia sön i sorvisc y les strotöres.
    L’Assoziaziun se tol dantadöt dant da informé sön i dërc y les ofertes d’assistënza, da organisé evënc a tema, da sostigní deplü na majera partezipaziun y colaboraziun dles porsones cun problems psichics y sü familiars. Implü colaborëia Ariadne cun dötes les organisaziuns y assoziaziuns y düc i istituc d’inrescida che á sciöche obietif le mioramënt dla cualité de vita de chëstes porsones - por la sanité psichica, bëgn de düc.

    Contac:
    Tel.: 0471 26 03 03
    E-mail: info@ariadne.bz.it
    Web: http://www.ariadne.bz.it

  • Ascuté sö
    Assoziaziun: “Telefono Amico Bolzano” (Telefon Amich Balsan)

    Le “Telefono Amico Bolzano” é gnü metü sö dl 1970 y dal 1973 fejel pert de “Telefono Amico Italia”, l’assoziaziun nazionala che dal 1967 coordinëia düc i Zëntri de “Telefono Amico” locai. 
    Dal 1991 incá, él atif vigni de dales 15 ales 24, por mirit dl sostëgn dla Provinzia Autonoma de Balsan y dl Comun de Balsan, n numer vërt debann (800 851097) resservé ma ala popolaziun dla provinzia. Dal 2006 incá él ince n numer unich nazional (199 284 284) che an arjunj vigni de dales 10 ales 24.
    Telefono Amico é n sorvisc olache an che che á debojëgn vëgn ascuté sö al telefon da volontars formá aposta, che pita aiüt por gní fora da situaziuns de crisa, avëi plü tlerëza y plü crëta te sües potenzialités.

    Contac:
    Tel.: 800 851097
    E-mail: bolzano@telefonoamico.it
    Web: http://www.telefonoamico.it/centrolocale.php?ID=5

  • Jonëza por la jonëza
    Assoziaziun: Juvenes Onlus

    Dí Juvenes a Balsan ó dí dí jonëza y döt ci che pó l’interessé, dal’animaziun al tëmp lëde, dal teater ales escurjiuns, dala formaziun ales propostes de spiritualité, dal impëgn solidar al’aurela cörta: nia ne vëgn porté dant zënza trá ite veramënter la jonëza. Ara se trata porchël de na lerch olache al n’é nia ma mëses da fá la belëita cun la play-stations, na cineteca y n sorvisc internet, mo ince referimënc a evënc significatifs cun un o de plü educadus a desposiziun. 
    Döt chësc aladô de chël stil salesian, che é l’arpejun lasciada da siur Bosco: acoliënza de cör, raporc nia formai, alegria, varieté de propostes, stimul dl’espressivité y sostëgn dla creativité.
    Le punt d’incuntada á le fin da pité oportunités y lercs d’agregaziun y amizizia y s’impegnëia a formé de “bugn cristians, zitadins sinziers y abitanc dl cil dl dagní”.

    Contac:
    Tel.: 0471 97 22 83
    E-mail: posta@juvenes.it
    Web: http://www.juvenes.it/home/

  • Sostëgn di paurs de munt
    Assoziaziun: “Volontariato in Montagna” (Volontariat sön munt)

    L’Assoziaziun é gnüda metüda sö dl 1996 ajache an aratâ che sostigní cun scioldi n’é nia dagnora la sora manira por daidé les porsones en dificolté (o les porsones che damana aiüt).
    Le Fondo di Solidarietà Rurale (Fonds de solidarieté rurala) s’á sovënz cruzié de caji olache la colaboraziun, l’assistënza, le sostëgn y l'aiüt sön i lüsc da munt dl Südtirol é stá cotant plü importanc por suravire co n su aiüt finanziar.
    Por chësta rajun á cater organisaziuns fondadësses (Unione Coltivatori Diretti dell’Alto Adige/Südtirol; Caritas Diocesana; Lebenshilfe ONLUS y Südtiroler Jugendring) metü sö l'Assoziaziun, cun l’obietif da daidé i paurs en dificolté cun le contribut de volontars por sconé le lüch y la vita dl paur.

    Contac:
    Tel.: 0471 99 93 09
    E-mail: info@bergbauernhilfe.it
    Web: http://www.bergbauernhilfe.it/it/benvenuti.html

  • Cooperaziun danter comuns vijins
    Organisaziun: “Fondo Comuni confinanti” (Fonds Comuns vijins)

    Le Fonds finanziëia proiec che interessëia i raiuns de confin dles regiuns Lombardia y Venet y les provinzies autonomes de Trënt y Balsan. Al vëgn regolamenté dal’Intenüda danter le Ministere dl’Economia y dles Finanzes, le Ministere di Afars Regionai, la Regiun Lombardia, la Regiun dl Venet y les Provinzies autonomes de Trënt y Balsan.
    L’obietif dl Fonds é chël da sostigní, finanzian proiec che valorisëia le svilup economich y sozial di raiuns comunai dles provinzies dl Venet y dla Lombardia che confinëia cun les provinzies de Trënt y Balsan, n svilup compat danter raiuns, arjunjon obietifs de balanza y solidarieté danter raiuns.
    I comuns vijins pó presenté propostes de proiet pro le Secretariat y le Comité Paritetich por la Gestiun dl fonds stabilësc la destribuziun di finanziamënc.

    Contac:
    Tel.: 0461 49 49 76
    E-mail: segreteria.fcc@provincia.tn.it
    Web: http://www.fondocomuniconfinanti.it

     

 Sitemap