Atualità
Premies de rendimënt por le personal insegnënt dles valades ladines
LPA - En chësc ann él presciapüch n miliun d’euro plü co l’ann passè tl fonds dles premies de rendimënt por le personal insegnënt. Por insegnanc y educadus di paîsc ladins dla provinzia él 164.000 euro a desposiziun. Por düc i insegnanc y i educadus dla provinzia él indöt 4,129 miliuns d’euro tl fonds dles premies de rendimënt. Les intendënzes dles scores y i sindacac s’à metü a öna sön chësta soma.
Insegnantes y insegnanć che laora cun lezitënza dess gnì premià. Chësc vëgnel odü danfora dal contrat coletif dezentral por ći che reverda les premies de rendimënt por le personal insegnënt, les educadësses y i educadus dles scores elementares, mesanes y altes por l’ann de scora 2004/05. Chësc fonds é gnü alzè de n miliun d’euro a 5,5 miliuns d’euro. Tiran jö i contribuć soziai réstel indöt 4,129 miliuns d’euro che po insciö gnì paià fora. La soma de basa dles premies de rendimënt fej fora 280,4 euro. La premia de rendimënt individuala alzada röia a 560,7 euro, le dopl dla soma de basa. Te caji particolars sciöche por ejëmpl insegnantes y insegnanć cun n gran numer de tlasses y scolars o che à desmostrè tratan l’ann na gran desponibilité a surantó inćiaries suraprò po ciafè ćiamò deplü. La premia de rendimënt mascimala ch’al é poscibl ciafè amunta a 841,1 euro. Aladô dl plann dess les scores ladines ciafè 164.000 euro. Sön la basa dl organich gnarà chësc import partì sö sön les scores. Mec chisc mesi finanziars ô ester por paié fora la soma de basa y l’ater mez é spo a desposiziun por les premies de rendimënt alzades.USP
