Atualità
Premiaziun di mius laûrs de scolares y scolars pro le concurs „Lì...por devertimënt“
USP - N gröm de scolares y scolars talians y ladins à tut pert al concurs pro le proiet „Lì…por devertimënt“. I mius laûrs gnarà premià en vëndres, ai 27 de mà 2005 tla scora dl comerz „Claudia De Medici“ a Balsan dal’assessuria provinziala Luisa Gnecchi.
Motivé jënt jona a lì; chësc ê le fin dl proiet „Lì…por devertimënt“ metü a jì dal Istitut Pedagogich Talian, dal Istitut Pedagogich Ladin y dal Ofize provinzial formaziun permanënta, biblioteches y audiovisuai. Porsones espertes à chirì fora libri por les scolares y i scolars de düć i livì de scora y ti i à dà inant da lì. Pro le proiet él inće gnü invié ia n concurs por les scolares y i scolars che aladô dl livel de scora messâ se dè jö cun compić desvalis. Insciö messâ por ejëmpl les scolares y i scolars dla scora elementara trasformè plü stories te öna o le bienium dla scora alta messâ cuntè na storia zënza parores ma cun sëgns. Na iuria à valuté i laûrs de düć chi che à tut pert. Chi che à fat i mius laûrs ciafarà n liber sciöche pest. I massmedia é dër bel invià a tó pert ala premiaziun en vëndres, ai 27 de mà 2005 dales 9.30 tla scora dl comerz „Claudia De Medici“, strada San Quirino 37, a Balsan.USP
