Atualità
Na frabica nueva per l Istitut Tecnich Cumerziel y per la Scola d’Ert Prufescionela a Urtijëi
USP – L Istitut Tecnich Cumerziel (ITC) “Raetia” y la Scola d’Ert Prufescionela Provinziela dëssa unì nluegedes te na frabica sun la spersa dl ITC. A chësta dezijion ie unic ncuei ai 14 de juni l Assessëur provinziel per i lëures publics, Florian Mussner, l Diretëur de departimënt Josef March, l’Assessëura cumenela Elisabeth Baur, i Diretëures de scola Otto Moling y Julius Senoner, l Ntendënt per la Scoles Ladines Roland Verra y l Diretëur de Repartizion Alexander Prinoth. Mo tl scumenciamënt de juni dl 2006 dëssel unì metù man cun l frabiché dla scola nueva.
Do deplù discuscions iesen śën unic a na dezijion n cont dla frabica nueva dl ITC “Raetia” a Urtijëi. Sun l terac dl ITC dëssel unì nluegià l ITC “Raetia” y la Scola d’Ert Prufescionela Provinziela. Tramedoi scoles ova ti ani passei da cumbater cun problems de lerch. “L departimënt per i lëures publics à fat na nrescida che mostra che tramedoi scoles à lerch sun l terac dl ITC y che n possa renunzië a na frabica nueva sun l terac tla steda Cademia coche n ova pensà de fé dant” dij l Diretëur de departimënt March. La frabica nueva à deplù vantajes. “Cun l ITC, la Scola Prufescionela y la Scola d’Ert, che ie iló dlongia, vëniel ragrupà duta la scoles segonderes te n zënter scolastich sun una na spersa”, dij l Assessëur Mussner. La frabica nueva ne tulëssa nia ora plu lerch che la frabica da śën cun la palestra, daviadechël ne ti unissel ala scoles ënghe nia tëut demez vel’ spersa liedia, mé che l grunt unissa nuzà miec. La palestra da śën dassëssa a chësc fin unì zareda ju y ntegreda tla frabica nueva. Dantaldut dassëssl unì nuzà nce la cubatura sota tiera, fajan ora sota la plaza per la paussa berstotes y locai defrënc che unissa luminedes da lassù ju cun lum naturela. I auti che ie aldidancuei parchei sun la plaza dan scola dëssa unì scunjarei te na garage sota tiera. Ntan l tëmp de frabica unirà n valguna tlasses dla scoles metudes ju provisormënter te d’autra scoles. La scola nueva, che sarà bonamënter purteda a fin tl’ansciuda dl 2008, dëssa aldò dl Diretëur de departimënt March avëi na cubatura de 28.000 metri cubics. I respunsabli dla scoles y la reprejentanta dl chemun ie ncuei unic a una n cont dla pruposta purteda dant dal departimënt per la frabiches. L Assessëur provinziel Florian Mussner dajerà ora proscimamënter l decret per la mudazion. Te n doi mënsc puderan po se aspité l prepoiet. “Tla fasa de proietazion dl preproiet se tenirons n cuntat cun la persones respunsables dla scoles tenian cont de si prupostes” à sotrissà l Assessëur Mussner. Zeche ti à l Assessëur Mussner bele pudù ti seguré ai respunsabli dla scoles: che la doi scoles vënie spartides nternamënter ala frabica.USP
