Atualità
La Consulta provinziala dla jonëza ladina é gnüda nominada danü
USP - En lünesc, ai 29 d’agost 2005 à la Junta provinziala sön domanda dl assessur Florian Mussner nominé danü la Consulta provinziala dla jonëza ladina metüda adöm da diesc comëmbri. “La Consulta resta trëi agn te süa inciaria y ara à le compit de rapresentè i interesc dla jonëza ladina a livel provinzial” à alzè fora l’assessur Mussner che à sambëgn ince tut l’ocajiun por rengrazié la Consulta da denant por l’impëgn y la colaboraziun tratan i trëi agn passà y ti à aodè tröp suzès te so laûr al gremium nü.
La lege provinziala por la promoziun dl laûr por y cun la jonëza dl 1983 vëiga danfora l’istituziun de na Consulta dla jonëza por le grup linguistich ladin. Les organisaziuns y les uniuns di jogn y dles jones, sciöche inće i comuns y le Consëi scolastich provinzial po mëte dant inoms de porsones che dess rapresentè les jones y i jogn tla Consulta. Danter chëstes porsones à la Junta provinziala nominé n grup de diesc comëmbri nüs che dess formè la Consulta dla jonëza nöia; chësta dess restè tl’inćiaria ćina tl 2008 sciöche organn aconsiënt dla Junta provinziala. Bele da d’aisciöda dl 2005 ê la dorada dl’inćiaria por la Consulta da denant tomada. “I oress rengrazié düć i comëmbri dla Consulta dla jonëza da denant por so impëgn. Al é de gran importanza che inće la jonëza dl grup linguistich ladin vëgnes rapresentada a livel provinzial. La Consulta dess mostrè sö ćiugn che é i interesc dla jënt jona, mo inće jì ite sön argomënć atuai, portè dant soluziuns a problems y aconsié la Junta provinziala canch’ara mët jö sües leges” à dit l’assessur Mussner. Implü à la Consulta la poscibilité de dè jö na minunga sön i planns anuai, de lauré fora diretives nöies sciöche inće de fà inrescides. “Por le rest po la Consulta inće sostignì l’organisaziun de manifestaziuns por la jonëza por promöie le stè adöm” à splighé Mussner. “Te n tëmp olache i jogn y les jones vëgn suraćiarià da informaziuns y ofertes por so tëmp lëde val debojëgn che la Consulta se dais jö cun chisc influsc te na manira critica y ti fejes spo propostes ala Junta provinziala por le laûr por y cun la jonëza” s’à Mussner tut a dì. La Consulta nöia é metüda adöm da chëstes porsones: Ines Demetz de Sëlva (Jëuni de Sëlva), Alma Frenademez da San Ćiascian (Sorvisc ai Jogn Val Badia), Kathia Nocker de Sëlva (Südtiroler Jugendring), David Senoner de Sëlva (Jëuni de Sëlva), Patrick Stuflesser de Urtijëi (Nëus Jëuni Gherdëina), Rita Stuflesser de Runcadic (Nëus Jëuni Gherdëina), Anita Verginer da San Martin de Tor (Sorvisc ai Jogn Val Badia), Dolorico Mischì da San Martin de Tor (en rapresentanza di comuns), Michaela Taibon da Al Plan de Mareo (en rapresentanza di comuns) y Judith Winkler da Rina (en rapresentanza di comuns). Sciöche rapresentanta dl Consëi scolastich provinzial él indô gnü confermè Irene Zingerle. La inćiaria de scrivana gnarà surantuta da Wilma Runggaldier. L’assessur Mussner ti aoda a chësta „scuadra nöia“ n bun laûr y inće tröpa ligrëza.USP
