Atualità
Mozart per la scoles ladines
Per l cumplì di 250 ani de W.A. Mozart dëssa duta la scoles ladines giaté coche scincunda l’opera ntiera de Mozart, l cumpositëur che vën suënz descrì coche l artist musichel plu genial de duc i tëmps.
L’idea de dé, n ucajion de chësc aniverser, n sëni cuncret tl ciamp dl’educazion de mujiga ie pieda via dal Istitut Pedagogich ladin y tëuta su cun entusiasm dal Assessëur Dr. Florian Mussner y si ufize per la cultura ladina. N proiet semient ie bele pià via tl scumenciamënt dl ann tla scoles di Paejes Tudësc.Ala basa de chësta idea sta l fat che iust la mujiga de Mozart ie scialdi adateda a ti slesiré ala junëza l azes ala mujiga tlassica n generel. Oradechël ie la mujiga de Mozart for inò stata n pont de referimënt per jëuni y jëunes che se à dat ju cun mujiga. Ënghe l nteressamënt ala persunalità de Mozart, che va dal mut ora de mesura da talënt al artist genial, possa vester de mpurtanza per la junëza y la mpulsé. L’opera ntiera de Mozart ne dëssa perchël nia mé nsci unì sëurandata ala scoles bel achiet via, ma cunferida do la cuntlujion de n curs de furmazion de n cër mpëni sun la vita y l’opera dl gran artist, a chël che duta la nseniantes y duc i nsenianc dla scoles de ublianza y dla scoles de mujiga à la puscibltà de tò pert.
L’opera ntiera de Mozart ie metuda adum da plu che 600 cumposizions sun 170 CDs y ie acumpanieda da na CD-ROM cun duc i librec y la vianviedes ai pec defrënc. Nia pert de chësta abineda n’ie mé de mëndra cumposizions che Mozart n’à nia purtà a fin y teles de chëles che n ne ie nia segures che ël sibe l autor. I inuemes di nterprec che à sunà y ciantà chisc pec de mujiga luna sciche perles te n collier lucënt: duc i nterprec, duta la orchestres y i ensembles ie cunesciui y recunesciui a livel internaziunel. Plu che l mez de duta la operes de chësta abineda ntiera ie unides tëutes su da nuef y te na cualità estremamënter bona.
usp
