Atualità
Forum cultural sön le teater ladin
Le forum cultural sön le teater ladin vëgn mëtü a jì dal Assessorat Provinzial y dala Consulta Ladina. Dötes les rapresentantes y düc i rapresentanc dles lies ladines y di comuns y chi che é interessà, é invià a chësta manifestaziun. Ala discusciun tolarà pert jënt che laora por le teater ladin y l’Assessur por la cultura ladina Florian Mussner.
Vigni ann organisëia l'Assessorat Provinzial por la Cultura Ladina y la Consulta Ladina n forum sön n tema cultural. L'argomënt dl forum de chëst ann é le teater.La manifestaziun mët man cun n refetar de Valentina Kastlunger, che jarà ite sön la situaziun atuala dl teater ladin. Ara cuntarà inće de sües esperiënzes personales tl ćiamp dla formaziun teatrala y dl raport danter le teater profescional y le teater amatorial. Suraprò moderarà Leo Senoner na discusciun cun l’Assessur por la Cultura Ladina Florian Mussner y porsones dl monn dl teater, sciöche Rudi Avi, Erika Castlunger, Edi Crazzolara y Marlis Moroder. D’anter ite saral i jobleri da La Pli che porta dant n sketch.
La manifestaziun vëgn tignida en sabeda, ai 28 de otober 2006, dales trëi domisdè tl salf dles manifestaziuns a La Pli de Mareo. Les rapresentantes y i rapresentanć dles lies ladines, i ombolć, i assessurs por la cultura y düć i interessà é de cör inviá a chësta manifestaziun. Le forum sarà por ladin.
Düć i media é inviá a tó pert a chësta manifestaziun
en sabeda, ai 28 de otober
dales trëi domisdè
tla Ćiasa dles Uniuns a La Pli de Mareo.
USP
