Atualità
Ejams finai tles scores altes ladines: 49 candidac
USP - Ala fin dl ann de scora 2006/07 se presentaral 48 scolars y n candidat che vëgn da foradecà, al ejam final dla scora alta tla reforma nöia. 38 candidac fajarà l’ejam te Gherdëna y 11 tla Val Badia.
Tles scores dles localitês ladines él 49 candidać che fajarà l’ejam de maturité tl mëis de jügn. La tlassa cun le majer numer de scolars é tl Istitut tecnich comerzial “Raetia” a Urtijëi cun 23 scolars. 15 de chisc frecuentëia la spezialisaziun turistica y linguistica y ot scolars la spezialisaziun “IGEA”. Implü él inće n privatist che fej l’ejam. Tl Istitut tecnich comerzial a La Ila tla Val Badia él önesc candidać. Tla Scora d’ert a Urtijëi él 14 scolars che fej l’ejam, ot de chisc se spezialisëia sön la pitöra, dui sön la scoltöra y cater sön la grafica. Pro i ejams finai él en chësc ann deplü mudaziuns. La lege sön la reforma dl ejam final statal dles scores altes é gnüda aprovada tl mëis de dezember 2006 dala Ciamena di deputać a Roma. Cun chësta lege él dantadöt gnü mudé les condiziuns d’amisciun y la composiziun dla comisciun. “Les comisciuns d’ejam é metüdes adöm do le regolamënt nü da trëi rapresentanć interns y da trëi rapresentanć da foradecà cun le presidënt estern. Mâ i candidać che é gnüs valutà positif te dötes les materies, vëgn ametüs al ejam », insciö dij le diretur dla Repartiziun Scora y Cultura ladina, Alexander Prinoth.USP
