Atualità
Scores altes ladines: les materies é gnüdes stabilides por le secundo ejam scrit
USP - Deboriada cun le Minister por l’istruziun Giuseppe Fioroni él gnü stabilì ai 17 de jenà 2007 a Roma les materies por le secundo ejam scrit dl ejam de maturité 2007 tles scores altes te Südtirol. Por la scora ladina ê l’Intendënt Roland Verra presënt dal’incuntada.
Tles valades ladines él en chësc ann les cuintes tlasses de trëi scores altes che se presentëia al ejam de maturité, la cuinta tlassa di Istituć tecnics comerziai a La Ila y a Urtijëi y la cuinta tlassa dla Scora d’ert a Urtijëi. Indöt él 49 scolars che tolarà pert al ejam. “I scolars dles cuintes tlasses tles scores altes ladines po s’arjignè ca plü spezificamënter al ejam śëgn che les materies che gnarà dant tl ejam é gnüdes stabilides”, dij l’Intendënt dles scores ladines Verra, che à chirì fora les materies deboriada cun le minister por l’istruziun Fioroni.Economia aziendala é la materia d’ejaminaziun tles scores altes a La Ila y a Urtijëi tl secundo ejam. Por la scora d’ert “Cademia” a Urtijëi él gnü scrit fora na proa de proietaziun.
L’Intendënt Verra à sotligneé en relaziun ai ejams de maturité, inće la sfilza de scomenciadives tles scores altes plurilinguiches a La Ila y a Urtijëi, olach’al vëgn insigné certes materies por todësch y d’atres materies por talian. Tl ann de scora 2007/08 gnaràl injuntè ai proieć bele esistënć d’atres ativitês. L’Istitut tecnich comerzial “Raetia” é tl laûr de abiné adöm sotescriziuns por mëte impé na spezialisaziun sportiva che se conzentrëia dantaldöt sön le sport da d’invern; sc’al vëgn arjunt sotescriziuns assà, spo pol bele gnì metü man da d’altonn cun chësc proiet en colauraziun cun alenadus dl Skiclub. Tl mëis de setëmber 2007 gnaràl daurì a Urtijëi la ćiasa di studënć “Assudei” por studënć dles atres valades ladines y de localitês foradecà che frecuentëia les scores altes a Urtijëi.
A La Ila vëgnel tut sö les iscriziuns por l’Istitut tecnich comerzial mo inće por le lizeum linguistich che ti pîta ai scolars l’insegnamënt di lingac todësch, talian, inglesc y franzesc, insciö dij Verra.
USP
