Atualità
Le Museum Ladin Ciastel de Tor scrî fora dui concursc artistics
LPA - Le Museum Ladin scrî fora dui concursc por promöie i artisc locai: le pröm “Pest artistich de scoltöra Richard Agreiter” y la partezipaziun ala “II. Trienala Ladina”. I dui concursc gnarà presentà en dedemesaledema, ai 14 de merz 2007, te na conferënza stampa a Balsan.
Le “Pest artistich por scoltöra Richard Agreiter”, scrit fora le pröm iade, vel 10.000 Euro y al s’adressëia a düć i sculturs de Südtirol, de Tirol y dl Trentin. Le pest vëgn surandè ai 31 d’agost 2007 en gaujiun dla “II. Trienala Ladina” tl Museum Ćiastel de Tor. La “Trienala Ladina” é na mostra artistica che vëgn metüda a jì vigni trëi agn dal Museum Ladin. I artisć dles cin valades ladines dles Dolomites po tó pert sciöch’inće vigni zitadin residënt te Südtirol che se sënt ladin. Na comisciun d’esperć chir fora cin artisć che realisëia l’opra proponüda y che la mët fora tl Museum Ladin.I dui concursc vëgn sostignis dal Museum Ladin y dal’assoziaziun di Museums provinziai de Südtirol.
Ai vëgn presentà ai 14 de merz 2007 te na conferënza stampa tl Palais Widmann a Balsan olach’al tolarà pert Sabina Kasslatter Mur, Assessuria por la Familia, la Sconanza di bëgns culturai y la Cultura todëscia, Florian Mussner, Assessur por la Cultura ladina, l’Intendënza ladina y i Laûrs publics, Bruno Hosp, presidënt di Museums provinziai de Südtirol, Heinrich Huber, vizepresidënt dl consëi aministratif di Museums provinziai de Südtirol y le diretur dl Museum Ladin Stefan Planker sciöch’inće le scultur Richard Agreiter.
I media vëgn invià de tó pert
y de referì sön la conferënza stampa
en dedemesaledema, ai 14 de merz 2007, dales 10.00
tl salf de stampa tl Palais Widmann,
strada Crispi 3, a Balsan.
USP
