Atualità
L assessëur Mussner a Roma: prejentazion de n liber y ancunteda cun l minister Fioroni
USP - L liber I Ladini una minoranza nella minoranza, sustenì dala Provinzia, ie unit prejentà ncuei, ai 20 de juni, tl Parlamënt a Roma dal assessëur Florian Mussner. Chësc liber dëssa ti purté dant ala jënt nosta realtà ladina y nosc bujëns. L assessëur se à ënghe ancuntà cun l minister per l’istruzion Fioroni.
L assessëur Florian Mussner à scrit la paroles danora dl liber I Ladini una minoranza nella minoranza de Hilpold/Perathoner. Te chësc liber vala di Ladins, la mendranza plu vedla dl Südtirol, de si situazion giuridica y si scunanza, dla rujeneda ladina y dla scoles te nosta valedes. “Tres chësc liber possen ti lascé al savëi la situazion y la ghiranzes di Ladins a truepa persones nsci nce ai parlamentars a Roma” spiega Mussner. “I Ladins, la plu pitla mendranza linguistica te Südtirol zënza nazion oma dovia, iel particularmënter de bujën scuné”chësc sotrissea l assessëur ntan la prejentazion dl liber tl Parlamënt.
L assessëur Mussner à nce ancuntà l minister per l’istruzion Fioroni. La scoles ladines cun si ponc de forza y si bujëns ie states al zënter dla descuscion. L minister à cuntà de si esperienza positiva ntan si vijita tla scola elementera y mesana de La Ila. Scialdi nteressant ti à sapù l plurilinguism praticà tla scola ladina. L minister Fioroni se lecorda for mo dl teater che ti ie unì purtà dant per talian, tudësch, ladin y nglëisc a La Ila. “La scola ladina ie n ejëmpl de cunvivënza danter cultures, n model per duta l’autra scoles dla Talia”, nsci l minister Fioroni. L assessëur Mussner ti à sëurandat a Fioroni nia mé l liber de Hilpold y Perathoner ma ënghe d’autra publicazions sun i Ladins y Südtirol.
USP
