Atualità
Dé dla cultura ladina
„ Nia aspetè che al sides i atri a baié de mendranzes, mo tó instësc la scomenciadia”: Le Presidënt dla Provinzia Luis Durnwalder à incö (12 de otober), en ocajiun dl Dé dla cultura ladina invié i ladins, a ester capazi de süa identité y cultura y tl medemo tëmp a ester europeisć convinti.
“Globalisaziun y identité: na sfidada por i ladins?”, chësc é le argomënt dl Dé dla cultura ladina, tignì incö (12 de otober) tl Palaz dla Provinzia Widmann a Balsan, sön scomenciadia dl Assessorat provinzial por la cultura ladina. Le Presidënt Durnwalder à definì chësc dé n’oportunité por fà le punt sön le tru di ladins, por odëi sciöche la situaziun di ladins é atualmënter y te ći direziun che ai ó jì tl dagnì. Ël i à invià a ne ester nia vitimes dl complès dla mendranza. “La globalisaziun à vantaji, mo an dess garantì le contribut spezial de vigni grup linguistich y de vigni mendranza, ajache vignun é n arichimënt por l’Europa.” Por chësc é la colaboraziun y le barat danter raiuns lingustichs ladins dl Trentin y dl Venet de gran importanza.
L’ Assessur Mussner à invié a vire y pratiché de maniera cosciënta le lingaz y la cultura ladina. “ Vigni lingaz à le medemo valur, anfat sce ël é tröp conesciü o de na picera mendranza. Crësce sö te n grup de mendranza renforza l’identité.” Por chësc à Mussner confermè che “ nosc dagnì mëss se basè sön nostes raîsc y sön nostes tradiziuns.” La globalisaziun, i sms, l’invajiun de slogans y de parores tecniches por ingleje pò ester n prigo por i lingać, dandadöt por chi dles mendranzes. Mussner à evidenzié che “ Por se fà n inom, mëss n lingaz gnì renforzé, ël mëss porchël ester presënt ti mesi de comunicaziun.” Cun referimënt a chësc à Mussner recordé che les scomenciadies dla Provinzia por amplié la redaziun ladina dla sënta regionala dla Rai, và tla dërta direziun. Por stlü jö à l’ Assessur apelè ala cosciënza ladina y ala vöia de investì tla cultura dl grup linguistich plö pice y plö vedl.
Al à spo tut la parora Frank – Thorsten Moll y Ulrich Runggaldier, che s’à dè jö cun le tema globalisaziun, ert y identité. Por stlü jö le convëgn, el spo gnü organisé na mësa torona cun l’Assessur Mussner, Andrea Rassel ( vizepresidënt FUEV), le jornalist Lucio Giudiceandrea y Ulrich Rungaldier (professur al’ université de Viena).
usp
