Atualità
Assessur Mussner sura le Dé mondial dla televijiun ai 21 de novëmber
LPA - Les Naziuns Unides à protlamè i 21 de novëmber sciöche le „Dé mondial dla televijiun“. L’Assessur Provinzial por la cultura ladina Florian Mussner tol chësc dé sciöche ocajiun por renvié ala gran importanza dla televijiun por le mantegnimënt y le svilup dl lingaz dla uma dla mendranza ladina te nosc paîsc. Mussner rengraziëia düc i jornalisc y i colaboradus, che dëida para pro les trasmisciuns televisives ladines.
Tres le Dé mondial dla televijiun ô les Naziuns Unides promöie le barat internazional de trasmisciuns sura la pêsc, la segurté, le svilup economich y sozial y la cultura. “Propi por na mendranza sciöche chëra ladina, é la televijiun tl lingaz dla uma de gran importanza y contribuësc sostanzialmënter a süa suraviënza“, sotlignëia l’Assessur Provinzial Mussner. „Tratan les trasmisciuns por ladin, aldiunse y odunse te nosc lingaz, notizies atuales y de cultura cun fotografies, che po tl medemo tëmp inće gnì odüdes da düć i atri abitanć de Südtirol. Insciö impara inće ëi a conësce nosc lingaz y nosta cultura“, dij Mussner. A chësta manira porta la televijiun ladina inće pro al renforzamënt dla cosciënza de sè di ladins, sotligna l’Assessur Provinzial por la cultura ladina. Implü vëgnel dè inant le lingaz, insciö Mussner. Ti ultimi agn él aumentè l’interesc por la televijiun ladina.
Tl 1979 à la „Rai Sender Bozen“ por le pröm iade trasmetü sporadicamënter trasmisciuns ladines. Intratan vëgnel trasmetü vigni dé n notiziar de cin’ menüć por ladin y tratan l’edema ćiamò atres trasmisciuns sura la cultura, la storia, la tradiziun, le sport y i.i. An po odëi le notiziar y les trasmisciuns por ladin te döt Südtirol y tla Val de Fascia, sciöche inće tles valades ladines dla Provinzia de Bellun. „Al é inće important che al po gnì adorè tratan le notiziar y les trasmisciuns, i idioms dles valades interessades“, arata l’Assessur Mussner.
„Mo messun inant menè do, che i tëmps de trasmisciun por ladin vëgnes aumentà y che al vëgnes trasmetü ćiamò deplü por ladin“, sotligna l’Assessur Provinzial Mussner. Na redaziun ma por i ladins foss dessigü por val’ y nosc sforc va te chësta direziun“, insciö l’Assessur Provinzial.
Mussner tol l’ocajiun por rengrazié i jornalisć y i colaboradus dles trasmisciuns ladines, deache „ëi informëia dé por dé cun profescionalité y sensibilité y da n contribut important por le mantegnimënt y le svilup dl lingaz ladin“.
USP
