Atualità
AP Mussner sotrissëia l’importanza dl lingaz dla uma
USP - Le pinsier al lingaz dla uma n’é gonot nia cosciënt, deache al é na pert de nos. Ma sc’i se confrontun cun i atri s’intenunse d’ester atramënter, de fà pert de n ater grup che se dà identité y se desfarenziëia dai atri. La cosciënza de fà pert de n grup ne dess mai condüje a combate i atri, mo mëss jì le tru dl respet, dl’azetaziun y dla pesc. L’assessur Florian Mussner sotrissëia cun chisc pinsiers l’importanza dl lingaz dla uma en ocajiun de so dé internazional dl lingaz dla uma ai 21 de forà.
“Sciöche pice lingaz de mendranza ùnse te nosta provinzia albü la fortuna da ciafè le reconoscimënt sciöche grup linguistich cun leges aposta che straverda le lingaz y la cultura, sce nos ladins instësc sun bugn da ti dè valur a nosta particolarité”, scrî l’assessur Mussner te n comunicat. “Chisc dërć dess gnì conzedüs inće ai ladins dles atres valades ladines fora dla provinzia de Balsan, suradöt a Fodom, Col y Ampëz. Ai à inće le dërt al reconoscimënt de süa identité ladina por podëi la stravardè dal jì pordüda”.
N pice lingaz de mendranza sciöche chël ladin adora suradöt la convinziun de süa jënt da le dè inant bele ai pici mituns te familia. Al dess gnì fat vigne sforz por ti dè prestije te vigni ćiamp dla vita publica y por slarié fora süa adoranza. De chësc vers vëiga l’assessur Mussner cun plajëi sciöche le ladin vëgn adorè ti comuns y ti ofizi publics che se dà jö cun i ladins.
“I ô tó l’ocajiun por rengrazié dötes chëres porsones che s’à dè jö y se dà jö cun convinziun por le svilup y le mantignimënt dl lingaz ladin: l’Istitut Cultural “Micurà de Rü” che te 30 agn d’ativité à dè n gran sostëgn al lingaz ladin te sü idioms dla Val Badia y de Gherdëina y inće al Istitut Pedagogich che à laurè y laora fora i mesi didatics por l’insegnamënt y la formaziun de nüsc insegnanć. Gran valur à da püch inca inće la catedra de ladinistica al’Université de Porsenù che po dè lapro na sbürla al’inrescida tl ćiamp scientifich”, dij l’assessur ladin.
L’assessur Mussner stlüj jö cun l’impormetüda de n so impëgn da laurè inant tl ćiamp dl lingaz y dla cultura por che le ladin restes inant la fondamënta dl’identité ladina.
SAN
