Atualità
Studi Pisa nce per scoles autes ladines
USP - Te n danmesdi de nfurmazion iel tl Academia Europea de Bulsan unì prejënta n analisa di resultac dl Studi Pisa tla scoles autes dla trëi grupes de rujeneda. L assessëur Florian Mussner à sorissà la bela paruda dla scoles autes ladines.
Danter i resultac che ie unic analisei iel nce chëi dla cater scoles autes ladines. De ndut iel unì cialà tres i resultac de 2.048 sculeies dai 15 ai 16 ani, dla Provinza de Bulsan. Tla prejentazion tla sënta dl Eurak a Bulsan, n juebia ai 15 de mei iel unì teni referac sun i ciamps dla scienzes natureles, dla matematica y dl liejer. Te duc trëi ciamps ie i sculeies dl Südtirol tl prim terzo dla garduatoria.
L assessëur ladin Florian Mussner à detlarà che da pert dla scola ladina iel da se ncunferté ajache chisc resultac mostra inò n iede na bela paruda per la scola ladina. “Per la valedes ladines iel nce mpurtant che la scoles tudësces y talianes à de bon resultac ajache na gran pert de nosc jëuni va inant te chëstes do la scola mesana”, nsci l assessëur ala scola ladina.
N cont dla scola ladina de ublianza à Florian Mussner dit bel tler che la njenia ca i sculeies tan bën da ti pité unfat pusciblteies per jì inant sciche te scoles dl’autra rujenedes.
Ti referac iel unì rujenà de defrënzies di resultac dl studi Pisa danter mutans y mutons. Sce tla scienzes natureles ie i resultac dla mutans stai boni, pona fova chëi di mutons mo miëures. N cont de liejer à la mutans prejentà de miëur resultac.
Analisà iel nce unì la defrenzies danter i sculeies de livel sozioeconomich defrënt. N cont dla scola ladina à l assessëur Mussner dit che chësta defrënzies sozioeconomiches à me n pitl nflus sun i resultac y che la scola ie bona de valivé ora chësta defrënzies che i sculeies mostra su da cësa ora.
I resultac plu avisa dl studi Pisa ie da pudëi cialé do sota http://www.schule.suedtirol.it/pi/themen/pisa03_1.htm tl internet.AS
