Atualità
Cuncors per la zircunvalazion de Sëlva
USP - La Jonta provinziela de Bulsan à tla senteda de (ncuei) lunesc, 3 de juni fat ora de scrì ora n cuncors de ideies per na streda de zircunvalazion per Sëlva. Per i proscimi 10 ani ie l program dla zircunvalazions tl Südtirol bele fat, perchël saral rie ntegré sëuraprò mo la streda per Sëlva. Danter l’autra decijions dla jonta iel nce pruvedimënc per al forza de compra, paiamënc ai chemuns per l IRAP, cuntroi de cuntribuc da plu provinzies, y la fundazion dla Business Location Südtirol.
“L program dla stredes de zircunvalazion per i proscimi 10 ani vëija dant proiec per d ndut 1.200 milon de Euro, al ann ons udù dant dai 100.000- ai 120.000 milion de Euro y de plu ne vala nia” a dit l presidënt Luis Durnwalder, perchël ne vëniel nce nia plu tëut su dumandes per proiec nueves. L Chemun de Sëlva se damanda bele giut na tel streda y śën ie unì dat pro de scrì ora n cuncors de ideies. “On fat la proves geologiches y śën vala inant sciche udù danora. Danz che l program ie bele drët plën y perchël iel permò da udëi sce n ie boni de junté nce chësc proiet” à dit l assessëur ai lëures publics Florian Mussner.
Forza de compra
La Jonta provinziela lëura inant per i pruvedimënc de miuré la forza de compra di zitadins. “On udù che l ie mo truep zitadins cun cuntrat coletif che ne arjonj nia i 1.000 Euro al mëns y cun i priejes che on al mumënt ne va chësc nia” à dit Drunwalder. Uni un che lëura cun lezitënza a tëmp plënn dëssa nce avëi tant da pudëi viver. La Provinzia deberieda cun i partner soziei se dajerà perchël da fé che l vënie arjont miuramënc ti paiamënc, lauran ora da nuef i cuntrac coletives.
IRAP
Dla chëuta IRAP paieda dala firmes de produzion, dà la Provinzia de Bulsan inant 17,9 milion de Euro ai chemuns.
Premi dal'Union Europea
Patrons de gruc te raions de cunfin pudëssa se damandé l pest per l mantenimënt dat dala Union Europea da tramedoi provinzies. Acioche l ne vënie nia dat ora doi iedesc l pest per la medema puscion, iel unì fat na cunvenzion cun la provinzies de Trënt, Belun y l Tirol dl Nord y dl Est per cialé do tei caji.
Sparanië burocrazia
Per smendrì burocrazia al zitadin à la jonta provinziela fat ora che i chemuns ne dëssa nia plu damandé al zitadins documënc dl liber fundier y dl cataster. Davia che i chemuns à l mesun de se to ora la nfurmazions diretamënter per via telematica, possel unì sparanià n lëur al zitadin che muessa fé vel dumanda.
Juesc al palé tla TV
La televijions tudësces ZDF y ARD à fat al savëi che per via de si cuntrac de dërc televisives cun la UEFA ne puderai nia mustré i juesc dl campionat europeich de juech al palé tl Südtriol tres antena sun tiera. L aministrazion provinziela à fat ora de nia ulëi fé na cunvenzion a posta cun la federazion dl juech al palé UEFA ajache te nosta provinzia puderan nce udëi i juesc al palé sun tla televijion taliana RAI, la svizra SRG y l austriaca ORF. Sëuraprò, nscì Drunwalder possen nce udëi i juesc tres antena satelitera.
Business Location Südtirol
La nueva sozietà “Business Location Südtirol/Alto Adige” dëssa sëurantò l atività de cumpré grunc per ativiteies economiches, fé riesc la nfrastrutures y les vënder inant a nteressei. “Se adurvon chësta sozietà acioche i grunc sibe plu riesc njeniëi da vënder inant a firmes nteressedes” à dit l presidënt Durnwalder. La Jonta à fat ora ciunes che sarà la persones che reprejenterà la Provinzia tla sozietà nueva. Tl cumité de gestion saral Hansi Felder (diretëur de ripartizion per artejanat, ndustria y cumerz), Barbara Repetto (diretëura dla ripartizion lëur, inovazion y furmazion prufescionela) y Markus Bernard. Per l cumité de revision ie unì numinà Peter Gliera, Sandra Lando e Stefan Aichner.
L “Business Location Südtirol/Alto Adige” dëssa aldò de Durnwalder scumencé si atività de jené 2009. Per chësta rejon uniral nce l ufize per la nfrastrutures y l ufize per raions de produzion destachei dala Provinzia de Bulsan.
as
