Atualità
Cumité nuef de evaluazion à metù man si atività
USP – L cumité nuef de evaluazion dla scoles ladines se à (ncuei) juebia, 5 de juni ancuntà per la prima senteda y à lità si presidënt. A cë de chësta grupa ie unì lità Lois Ellecosta. L duvier per i proscimi cater ani ie chël de mëter dant i argumënc aldo de chëi che dëssa unì valutedes la scoles ladines. L’assessëur ala scola ladina, Florian Mussner vëij tl’evaluazion n aiut y na motivazion per tenì aut l livel de nosta scoles.
L cumité de evaluazion per la scoles ladines à cin cumëmbri, tl cajo dla scoles tudësces y talianes ne n iel nuef. Sciche l ie udù dant per lege dëssa la maiuranza reprejenté istituzions ora dla scola. Cumëmbri nueves ie Gerda Videsott de Al Plan, che ie unida numineda n reprejentanza dl’università de Bulsan y Silvia Demetz da S.Cristina per l cunsëi scolastich provinziel. Sun l’esperienza di cater ani passei possa se stizé Eveline Moroder Rabanser de Urtijëi che reprejentea i chemuns de Badia y Gherdëina. Da pert dla Ntendënza Ladina iel inò unì numinà Lois Ellecosta y per l Istitut Pedagogich Ladin Theodor Rifesser.
“L’evaluazion dëssa mustré su l livel dla scoles esternamënter per la populazion ma nce internamënter per mustré su de ce vieres che n possa mo miuré”, nscì l pensier dl assessëur ala scola ladina Florian Mussner pra la senteda costituënta. L’evaluazion dla scola ne dëssa nia vester ududa sciche na ispezion da pert istituzionela ma n mesun che juda a valorisé l lëur che vën fat tla scoles ladines. Uni scola à si autonomia che muessa resté te na cërta mesura per garantì na bona basa a uni sculé che jirà mo inant a scola.
Presidënt dla grupa nueva de evaluazion ie unì lita Lois Ellecosta che se se ova nce sëurantëut de chësta ncëria ti cater ani passei. Tla senteda constituënta, tl Istitut Pedagogich Ladin a Buslan ti iel unì dat la crëta a Eveline Moroder per la ncëria da vizepresidënta.
Ntan i ultimi cater ani ova la prima grupa de evaluazion cialà che uni scola ladina vënie analiseda. Ti proscimi cater ani ulëssen crì ora argumënc aldo de chëi che la scoles ladines dëssa unì valutei. N pont de referimënt ie nce chël de analisé co che n ti va permez a problems dl mumënt sciche per ejëmpl canche vel sculeies nueves ne ntënd nia nosta rujenedes. Aldo dl assessëur Florian Mussner ne dëssa la scola ladina nia se paredlé cun la scola tudëscia y taliana de nosta provinzia, ma cun scoles che lëura ënghe cun cater o cin rujenedes sciche da nëus.
L ufize per l’evaluazion dal scola ladina à si sënta a La Ila y à nce n ufize a Bulsan, tla sënta dl Istitut Pedagogich Ladin. Per l’autonn iel udù dant de pudëi to su na terza persona per chësc lëur.
as
Galaria dales fotografies
Foto USP/Pertl
