Atualità

Scora / Cultura | 23.06.2008 | 12:23

Dumandes per l pest ala viles de valuta

USP - Per l prim iede à l Assessorat ladin dla Provinzia de Bulsan chëst ann scrit ora n pest per la viles tla Val Badia che ie de gran valor per la cuntreda tipica tl cheder dl respet per nosc ncësa. N vënderdi ai 27 de juni ie l ultimo di per de jù la documentazion per fé pea l cuncors.

La carateristica dla viles tla Val Badia dëssa unì mantenida. L ie na gran richëza culturela che reprejentea nce na maniera de frabiché tl respet dla cuntreda. L’Assessorat Ladin à scrit ora n pest de 7.000 Euro per l lëur che reprejentea miec la inuvazion n relazion cun l cialé ora. “Cun l pest ulons sustenì chi che se mpënia a mantenì chësta richëza dla viles tl respet de nosc raions nce sce l ti costa truep”, nsci l pensier dl assessëur Florian Mussner.

Nchin a n vënderdi ai 27 de juni possa i chemuns dla Val Badia fé prupostes per l pest mandan ite fotos, n plann dl raion, dessënies y na descrizion dl ntervënt che ie unì fat ala vila.

Na cumiscion cun 7 esperc de architetura, cultura y dl mantenimënt dla cuntreda valuterà la viles che ie unides fates da nuef, che ie unides cumededes o che ie unides ngrandides. Per l pest vëniel nce tëut n cunsciderazion lëures che ie unic fai pra luesc cun de plu strutures y proiec per l miuramënt dla vila y de si ntëurvia.

La valutazion unirà fata aldò dla cualità dl ntervënt, la mpurtanza dl lëur per l cialé ora dla vila y l respet per aspec culturei y monumentei. L pest per la vila de valüta unirà pona nce cris ora aldò de tan bën che l lëur che ie unì fat passenea tl cheder generel dla vila. N criter de valutazion ie nce l fin dl ntervënt y tant che l reprejentea na simbiosa danter inuvazion y tradizion.

L pest de 7.000 Euro ti jirà al patron dla vila premieda. Per l  proietant iel udù dant na numinazion de lauda.
I proiec mandei ite per chësc pest unirà prejentei al publich te na mostra. 

as

Galaria dales fotografies