Atualità

Scora / Cultura | 01.07.2008 | 14:52

123 cuntribuc per la cultura ladina

USP – La Jonta provinziela à dat pro la segonda pert di cuntribuc provinziei per sustenì la cultura ladina. Tl prim mez ann iel nsci bele unì dat pro de ndut 1.085.200 Euro per sustenì lies, artisc' y aministrazions publiches che se dà ju tl ciamp dla cultura ladina.

Feter duta la 143 dumandes de aiuc finanziei à la Consulta culturela ladina pudù tò n cunsciderazion per chësc ann. “Sce pudon dé n aiut te 123 caji pona iel n sëni che te nosta valedes vëniel fat truep per mantenì nosta arpejon culturela ladina” se ncunforta l assessëur ladin Florian Mussner, “Scioldi ne ie dessegur nia dut, ma zënza scioldi iel damat rie a purté inant ann per ann ativiteies cultures”. Cun la delibra dl 30 de juni an śën bele spartì su l 90% di mesuns finanziei a desposizion per la cultura ladina ntan chësc ann.

Ativiteies cultureles y editorieles
L majer capitul tol ite i cuntribuc per ativiteies dla lies y di artisć. Cun 422.000 Euro an bele adurvà su l 92,7% di scioldi a desposizion. Chësc capitul ie unì spartì su sun 78 lies y 12 artisć. La majera somes per l’atività ordinera à nchin a śën giapà l’Union di Ladins dla Val Badia (55.000 Euro), la Union di Ladins de Gherdëina (40.000 Euro) y La Union Generela di Ladins dla Dolomites (25.000 Euro). L’Union Generela giapa uni ann n cuntribut sëuraprò de 52.000 Euro per la stampa dla Usc di Ladins. 22.800 Euro dl capitul per la stampa de libri y la furmazion iel unì partì su danter lies y persones singules. Chësc fej ora l 32,6% dla despunibltà per chëst ann.

Nvestimënc culturei
La lies cultureles à uni tant nce de bujën de nvestimënc per mantenì si guanc, cumpré strumënc o fé ite vel toch te si local dla lia. Te chësc capitul à la Jonta provinziela nchin śën dat pro cuntribuc per 165.400 Euro che fej ora l 82,7% di scioldi a desposizion. L capitul di nvestimënc ie tl prim mez ann bele unì spartì su sun 31 lies.

Chemuns y aministrazions
Nce l’aministrazions publiches giapa tres l Assessorat provinziel ladin aiuc per mantenì la cultura ladina. Pra i chemuns iel i nvestimënc che fej ora la majera soma: 18.000 Euro che ti va duc al Chemun da La Val per la mubilia dla cësa multifunzionela. Per ativiteies cultureles da pert dl’aministrazions publiches iel 10.000 Euro a desposizion. Chisc ti va chësta ann ala Comunità Raionela dla Val de Puster per na publicazion (7.500 Euro) y al Chemun de Urtijëi per na mostra de artisć ladins adum cun la grupa Deberieda (2.500 Euro). Sëuraprò ala dispunibltà dla Consulta à l Istitut Culturel Ladin Micurà de Rü giapà n cuntribut de 395.000 Euro per chësc ann.

Spartizion di cuntribuc
I mesuns finanziei per judé a mantenì la cultura ladina vën metui a desposizion dala Provinzia de Bulsan aldò dl pruporz. I 1.200.000 Euro a desposizion per l ann 2008 vën spartì su aldò dla dumandes che vën mandedes ite. La Consulta culturela ladina, na cumiscion de sies persones valuteia aldò dl valor culturel y dla cumpëida dla persones che fej pert de na lia o de n proiet, la mesura dl cuntribut. Presidënt dla Consulta ie l assessëur Florian Mussner, che fej la prupostes de cuntribuc al Guviern Provinziel deberieda cun Hubert Irsara, Hilda Sottara, Lois Ellecosta y Bruno Senoner. Per cuntribuc n cont de mujiga y ert vëniel tëut n cunsciderazion n bënsté dai esperc Albert Mellauner y Eduard Demetz.
“La cultura ladina ne dëssa nia me unì cureda a livel di luesc singuli ma nce a livel de valeda y sëura la sëides dla valedes ora, perchël ie drët che ativiteies de chësta sort giape ënghe n si aiut finanziel” à dit l assessëur Florian Mussner.

as

Galaria dales fotografies