Atualità
L proiet „Ladins tl Monn“ unirà prejentà ai 12 de agost
USP - “Ladins tl Monn” ie l titul de n proiet culturel cun l fin de renfurzé l’identità di Ladins che viv ora dla trëi provinzies ntëur Mëisules. L assessëur ladin Florian Mussner prejenterà chësc proiet adum cun Giorgio Moroder n merdi, ai 12 de agost a Bulsan.
Da mënsc vëniel laurà per mëter a jì l proiet “Ladins tl Monn” che cëla de crië n liam danter i Ladins che viv ora dla trëi provinzies ntëur Mëisules, te d’autri paejes o cuntinënc dl mond. L proiet ti dà n gran pëis al sustëni dl’identità ladina y a dé inant chësta cunscienza ala jënt jëuna che vën do. Chësta ie na scumenciadiva dl assessëur Florian Mussner che prejenterà persunalmënter la plataforma internet ”Ladins tl Monn”. Ala prejentazion de chësc proiet sarà nce leprò Giorgio Moroder, cumponist de fama nternaziunela, reprejentanc dla provinzies de Belun y Trënt sciche nce i reprejentanc di chemuns ladins.
Duc i media ie de cuer nviei a tò pert
ala prejentazion dl proiet “Ladins tl Monn”
n merdi, ai 12 de agost 2008 dala 10.00
tl palaz Widmann, streda Crispi 3, a Bulsan.
USP
