Atualità
Tëuta de pusizion dl Assessëur Mussner y dl Ntendënt Verra sun 60 ani de scola paritetica ladina
USP - Ai 27 de agost 1948 univa publicheda la urdenanza dl Minister Guido Gonella n. 5145 che metova dant l model paritetich de nseniamënt per la scoles elementeres ladines te Gherdëina y tla Val Badia. "Ti ultimi 60 ani iel unit fat dl dut per crië na scola per i ladins, che curespuend a si bujëns", nscila sotrissea l Assessëur ladin Florian Mussner y l Ntendënt Roland Verra, che rengrazieia duc canc per l lëur de gran valuta tl ciamp dla scola.
"Cun l documënt dl Minister Gonella nasciova l sistem paritetich, do truepa pustejedes y discuscions bëndebo’ ciaudes sun l daunì dla scola tla valedes ladines ti ani do la Segonda Gran Viera.
N muessa dì che la prima pruposta de chësc sistem fova unida da jënt de scola y dla aministrazions dla Val Badia che se ova ancuntà ai 23 de agost 1945 a Picolin per crì na soluzion balanzeda ala adurvanza di lingac de nseniamënt te nosta scoles, do che l fova stat la scola mé per talian ntan l fascism y mé per tudësch ntan l nazional-sozialism.
Chësc model scolastich, tëut su plutosc criticamënter da na pert dla populazion te chëi ani, unirà pona laurà ora plu avisa tl segondo statut de autonomia y adatà nce la scola mesana y auta.
N possa dì che l decret dl 1948 ie l prim documënt ufiziel de nosc urdinamënt scolastich paritetich che ie mò n drova al didancuei. Daviadechël ulons tò l’ucajion per lecurdé i 60 ani de scola paritetica ladina, n model che à purtà de bon fruc a nosta populazion y che vën suvënz mustrà su coche ejempl de plurilinguism vivù concretamënter. L ie n model che n ulessa da cër’ ambienc te nosta provinzia nce fé do, zënza tenì cont che l fova unì istituì prinzipalmënter per varenté la mendranza ladina.
60 ani de storia ne ie nia truep per n sistem scolastich, ma purempò iel unì te chësc tëmp fat n gran lëur per pudëi ti dé ala populazion ladina na scola che curespuend a si debujëns: l ie unì segurà urdinamënc y programs speziei, l ie unì garantì na furmazion aposta y graduatories reservedes per nosc nsenianc, l ie unì njenià cà strutures scolastiches y furmatives, materiai didatichs, cursc de furmazion y n sistem aministratif, de nrescida y de evaluazion aposta per chësta che ie la mëndra scola dla Provinzia ma segurmënter la plu cumplicheda y la plu particulera sibe per i resultac che per la soluzions metodologiches che ie da garat.
Ulessan tò la ucajion de chësc anuel per ti sentì gra a duta la jënt de scola che à cun si lëur, si idealism y si criatività pudù fé a na maniera che chësta scola paritetica ladina se ebe, do 60 ani, merità l recunescimënt y la stima dla jënt de Gherdëina y dla Vla Badia y sëuraprò monce l respet dl mond scolastich y academich da oradecà"
Florian Mussner Assessëur
Roland Verra Ntendënt
SAN
