Atualità
Di dla cultura ladina ai 2 de utober a Bulsan
USP - N juebia, ai 2 de utober 2008 uniral tenì l “L di dla cultura ladina” tl palaz Widmann a Bulsan. L Assessorat ala Cultura ladina y la Cunsulta culturela ladina à per chëst ann cris ora l argumënt “Architetura y cultura: Ce funzion à pa la cultura dl frabiché y dl abité n relazion al’identità?”. L di dedicà ala cultura ladina cun l Assessëur ladin y l Presidënt dla Provinzia uniral tenì referac y na mëisa turonda.
La mpurtanza dla cultura dl frabiché y dl abité ie l argumënt zentrel dl di culturel, ai 2 de utober, a Bulsan. Tan inant possen pa regulamenté la cultura dl frabiché? Ce un ie pa l raport danter frabiché, turism y economia tla valedes ladines? Cie ie pa n’architetura alpina de cualità? L unirà ënghe tëut n cunsciderazion i aspec de funzionalità, de tradizion y de contemporaneità tl frabiché. L ti unirà dat lerch a prupostes cuncretes per svilupé la cultura dl frabiché tl daunì.
Sciche mpuls per la descuscion uniral tenì doi referac.
L prim referat „Ist eine regionale Baukultur möglich?” unirà tenì da Andreas Gottfried Hempel, prufessëur de architetura y jurnalist. L segondo “Mutazioni, costruzione di un nuovo paesaggio sudtirolese” unirà tenì dal architet y diretëur dla zaita Turris Babel, Carlo Calderan. Pra la descuscion tol pert l Assessëur ladin, Roland Dellagiacoma, Diretëur dla Repartizion Natura y Cuntreda y i architec Siegrid Piccolruaz y Hannes Mahlknecht. La descuscion vën mudereda da Diego Clara. L Assessorat ladin y la Consulta culturela ladina nvieia de cuer duc i nteressei a tò pert ativamënter ala manifestazion
n juebia, ai 2 de utober
dala 9.00
tl palaz Widmann a Bulsan.
as
