Atualità
Borsa dl lëur pra l’Adria ie stat n suzes
USP – Per abiné culaburadëures che unissa ntan l inviern a lauré ti hotiei y tla ustaries à la repartizion provinziela per l lëur metù a jì deberieda cun la lia di osc' HGV na borsa dl lëur pra l’Adria. La borsa metuda a jì a Lignano Sabbiadoro y per l prim iede nce a Grado à abù suzes.
La borsa dl lëur à drët valù. Passa 100 persones à mustrà nteres de unì a lauré ntan l inviern tl Südtirol. La majera pert ulëssa gën unì a lauré da chelner, barist, cuech o a fé la majons. Nce sce l’azion dla borsa de lëur pra l’Adria ie bele fineda via, tol i ufizies per l lëur mo su dumandes per stieres y les dà inant ai zëntri de mediazion dl lëur tl Südtirol.
“La esperienzes positives cun la borses dl lëur, desmostra che la jënt ie desposta de se spusté ajache la ie nteresseda de unì a lauré tl Südtriol ntan la sajon da inviern” se ncunforta Helmuth Sinn, diretëur dla repartizion provinziela dl lëur. “Nce per mprejes dl Südtiorl cumporta l tò su culaburadëures di luesc dl Adria na bona maniera per abine culaburadëures”, dij Sinn.
La repartizion per l lëur nvieia nce la mprejes tla valedes ladines de se mëter n cuntat cun i zëntri de mediazion de culaburadëures a Burnech (o Schlanders) per abiné jënt per l inviern. Chi che chier culaburadëures possa nce l fé al savëi tres la plates provinzieles tl internet sun l adres www.provinz.bz.it/arbeitsboerse.
as
