Atualità
Cunsulta ladina di jëuni nueva
USP – La Jonta provinziela de Bulsan à numinà la nueva cunsulta provinziela di jëuni y dla jëunes per la grupa de rujeneda ladina, che resterà nchin al 2011. La dëssa purté dant prupostes al guviern provinziel n cont dl lëur per y cun la junëza, ndicazions per l plann anuel provinziel, per leges nueves, cuntribuc y nrescides sun jëuni y jëunes y cuestions de mpurtanza per la junëza.
Sun 11 cumëmbri nen’iel unì numinà 7 de nueves, 4 vën cunfermei. Aldò dla lege possel vester nchin set cumëmbri aldò de prupostes fates da urganisazions per jëuni, nchin trëi sun prupostes di chemuns y un aldò dl arat dl cunsëi scolastich provinziel.
Dla Cunsulta fej pert, sun pruposta de urganisazions per la junëza: Vito Campei da La Val, Alma Frenademez da S.Ćiascian, Gottfried Nagler de Badia, Manuela Ploner da La Pli, Stephan Ploner da S.Martin, Martina Rier y Patrick Stuflesser de Urtijëi. Martina Goller de Urtijëi, Dolorico Mischì da San Martin y Carlo Runggaldier de Sëlva ie uni numinei sun pruposta di chemuns dla valedes ladines. Sciche reprejentanta dl cunsëi scolastich provinziel fej Hannelore Insam pert dla cunsulta di jëuni.
La cunsulta à dantaprima na funzion cunsulënta. Da chëla persones che à n cuntat plu strënt cun la junëza giapa l’aministrazion provinziela prupostes n cont dla mpustazion dl lëur per y cun la junëza. Cuncretamënter se tratel tlo de udëi dant la linies dl ufize provinziel per la junëza y de co che dëssa unì nuzà l miec i mesuns finanziei a desposizion. Tla cumpetënza dla cunsulta iel nce de fé prupostes per normes y leges n cont de jëuni y jëunes, o per nrescides nueves.
La cunsulta nueva ie drët balanzeda ora n cont dla doi valedes Badia y Gherdëina y l’età di cumëmbri ie mesanmënter danter i 20 y 33 ani.
as
