Atualità
Mussner: I mejes de Gherdëina spidlea nosta ravises
USP- L assessëur provinziel ladin, Florian Mussner sustën la scumenciadives dl Museum de Gherdëina per valorisé i mejes de Gherdëina. “La prejentazion dla cherta di mejes dl 28 de nuvëmber ie n var mpurtant” sorissea l assessëur.
Nce sce l turism à purtà de gran mudazions tl cialé ora di luesc y dla cuntreda te Gherdëina, ie i vedli mejes che ie mo restei, na carateristica mpurtanta che spidlea nosta cultura y nosta ravises. Cun chësc pensier sorissea l assessëur provinziel ladin Florian Mussner la mpurtanza de valorisé i mejes de Gherdëina.
N vënderdi ai 28 de nuvëmber uniral a S.Cristina prejentà n lëur de nrescida sun i mejes de Gherdëina cun na cherta di mejes. Sun ncëria dl Museum de Gherdëina y cun sustëni dl Assessorat provinziel Ladin ie unì fat n nventer di vedli mejes che ie mo restei danter Bula y Plan. L’analisa ie unida fata tenian cont de carateristiches de costruzion, de tipologia, di sënies dl tëmp y di lëures de mantenimënt. L ie unì cataloghisà 512 mejes de Gherdëina, 172 tl Chemun de Urtijëi, 103 a Sureghes, Bula y Runcadic, 119 a S.Cristina y 118 te Sëlva. I plu vedli mejes ie unic fai su ala fin dl XIII secul. Na udleda generela di mejes de Gherdëina ie unida anjenieda sun na cherta di mejes de 6 metri.
Nsci sciche n ti dà gran mpurtanza al mantenimënt dla Viles dla Val Badia uelen nce te Gherdëina sustenì y sensibilisé la testemunianzes cultureles-architetoniches. “Messon se lecurdé da ulà che union y se rënder cont che nosta cuntreda cun i vedli mejes ie na particularità dla valeda che ne pudon nia renunzië” dij Florian Mussner.
N cheder generel di mejes de Gherdëina unirà prejentà n vënderdi 28 de nuvëmber dala 6 da sëira tla sala de chemun a S.Cristina.
as
