Atualità
N liber nuef de leteratura ladina (ntervista audio)
USP – Pra la premiazion dl cuncors de leteratura „Auturs ladins scrì...“, n sada sëira a Urtijëi, iel nce unì prejentà l liber di pec che à venciù l cuncors. Iaco Rigo y Ivan Senoner à pudù pië do dala mans dl assessëur provinziel Florian Mussner l prim pest y truepa laudes. Na bela cumpëida de publich à mustrà gran nteres per l’opres nueves scrites tla rujeneda ladina.
Nosta rujeneda dl’oma vën rujeneda gën y da truepa persones, ma l mancia n pue tla leteratura, tla documentazion scrita. Cun chësc pensier fovel bele dan 7 ani unì nvià via n prim cuncors de leteratura ladina. Do la sperienza dl 2004 an pona scrit ora na segonda edizion. „Son drët cuntënc ajache chëst iede iel stat de plu che à fat pea, l fova nce truep jëuni y i pec dai ju ie de bon livel“ à dit l assessëur ladin Mussner.
Tla categuria generela à venciù Iaco Rigo dala Pli de Mareo, n autor de gran sperienza che à nce bele scrit de plu pec de mujiga y teater. Danter i jëuni nchin 30 ani se à Ivan Senoner de Urtijëi davanià l pest de 3.000 Euro. Ël ova nce venciù dan cater ani.
Tl pez “Verijun de n caprize” scrij Iaco Rigo de doi jëuni che se scuend plu giut te na caverna. Ël ulëssa tenì n cunzert de vidula y deventé drët cunesciù. Duta la storia ie baseda sun mujiga y i Capricci de Paganini. Ivan Senoner à scrit na lijënda moderna che trata de na familia de hotelieres neorica. Tl pez „Tré l’ega“ se mescëida drët bën l passà storich y l nventà, la realtà y la fantajia.
I doi pec che à venciù l cuncors ie unic valutei da na giuria de cin esperc de gran cumpetënza leterera. I criters do chëi che n à cris ora i miëur pec ie stai l cuntenut, la strutura, l uriginalità y la cualità dla rujeneda. L se à dat ca Paul Videsott sciche presidënt, Marco Forni, Rut Bernardi, Ida Valentin y Tone Gasser. Chësta giuria à laudà la rujeneda sperimentela de Ivan Senoner, esprescion dla generazion jëuna. Dl pez de Iaco Rigo ti à ai esperc drët plajù tan bën che l à laurà ora la rujeneda.
„Cun chësc cuncors ons ulù mutivé a scrì per ladin. Tres l’opres letereres vën nosta rujeneda svilupeda inant y arichida“ à sorissà Florian Mussner. La rujeneda possa me sëuraviver sce la à nce leteratura da pudëi liejer do. Do chësc moto pënsa l assessëur Mussner, l diretëur de repartizion Alexander Prinoth y si culaburadëures bele a na terza edizion dl cuncors de leteratura ladina. L fin ie chël che mo de plu scrije te si rujeneda dl’oma y che i miëur pec vënie nce publichei.
Per na grupa de rujeneda de pitla cumpëida iel dassënn rie publiché l’opres scrites. L Assessorat provinziel ladin se à sëurantëut de dé ora n liber cun i doi pec che à venciù l cuncors. L liber nuef de leteratura ladina ie unì stampà 1.200 iedesc y vën scincà a nteressei. N possa se l damandé tl Ufize provinziel per la cultura ladina (tel 0471 41 70 20) o l apusté tl internet sun la plates www.provinz.bz.it/cultura-ladina tl sezion publicazions.
as
Galaria dales fotografies
Foto USP/Stuffer
