Atualità
Patrick Stuflesser a cë dla cunsulta ladina di jëuni nueva
USP – La nueva cunsulta provinziela ladina di jëuni à nsëira (27 nuvëmber) lità Patrick Stuflesser a presidënt. L assessëur provinziel ladin Florian Mussner deberieda cun Klaus Notdurfter y Wilma Runggaldier dl Ufize di jëuni, à laudà la ueia de fé di undesc cumëmbri. Cun la senteda costituënta tl Kassianeum a Persenon iel bel unì fat n prim var de bona culaburazion a bën dla junëza tla valedes ladines.
Patrick Stuflesser, 33 ani de Urtijëi ie unì lità cun 7 stimes sun 10 a presidënt dla Cunsulta ladina di jëuni. La ncëria dla cunsulta, numineda dal Guviern provinziel, vel per trëi ani, nchin al 2011. Stuflesser à pudù fé esperienza tl’atività per i jëuni te chëla che l ie bele da plu ani presidënt dla Nëus Jëuni Gherdëina. A gran maiuranza ie Dolorico Mischì da San Martin unì lità vizepresidënt.
“La cunsulta ie penseda sciche anel de liam danter l mond jëunn y l’aministrazion provinziela” à dit nsëira l assessëur ladin Mussner. Te tëmps de globalisazion, te chël che dut va plu debota iel mpurtant che la usc de jëuni y jëuns vënie scuteda su” à juntà l assessëur.
Pra la prima senteda dl cunsulta iel sëuraprò ai undesc cumëmbri mo unì cooptà Silvia Alfreider, che lëura per l Servisc ai Jogn Val Badia.
Klaus Notdurfter, diretëur dl Ufize provinziel di jëuni à laudà dassënn la bona culaburazion danter la pert tudëscia y ladina n cont dl lëur che vën fat per la junëza. “Bele al scumenciamënt dl lëur nuef dla Cunsulta ladina é pudù sentì na gran mutivazion” se ncunforta Wilma Runggaldier, che lëura per la junëza ladina tl ufize provinziel.
N cont dl atività cunsulënta, cuncretamënter l udëi dant linies de lëur per l ufize provinziel y l nuzé di mesuns finanziei, à l assessëur Mussner dat pea n pensier zentrel: “Mpenië nosta energies per la chemunanza, chësc dassëssa vester la politica. Y sce suvënz iel deventà auter dainora, pona messons for cialé de ne pierder nia ora di uedli chëla che ie perdrët la mira, l ideal.” A mez jené se ancunterà inò la cunsulta di jëuni per fé´ora la pruspetives per l 2009.
La cunsulta ie nce na bela ucajion de ancunteda y cunlaurazion danter la valedes ladines, ma nce danter plu grupes de rujeneda. “Propi nëus ladins y ladines pudon fé da puent danter cultures, che se stënta datrai a se ancunté y se capì” à finà via l assessëur ladin.as
