Atualità
Lijëndes ladines merita majera denità culturela
USP – Cun na publicazion nueva de materiai per la scoles uelen cuntribuì a ti dé na majera denità culturela ala lijëndes ladines. La Ntendënza per la Scoles Ladines dla Provinzia de Bulsan, deberieda cun la Lia culturela Fanes y la Cumunanza Ladina a Bulsan à prejentà n liber nuef dal titul “Lijëndes y cianties” che unirà spartì tla scoles de Gherdëina y Badia.
Tla prima pert dl liber scrij l ntendënt Roland Verra sun la fazion che la lijëndes à abù tla leteratura ladina. L se trata de n studi de diesc capituli de co che autores ladins se à aspirà al’arpejon dla lijëndes. Chësta pert dl liber ie penseda per sculeies dla scoles mesanes y scoles autes ladines. Na lingia de cianties sun la lijëndes ie l cuntenut dla segonda per dl liber. I 8 pec metui adum da Fonjo Willeit trata dla lijëndes de Fanes y ie adatei per i mëndri sculeies, chëi dla scolines y dla scoles elementeres.
La lijëndes de nosta valedes vën for deplù adurvedes per fins cumerziei. “Nosc avëi culturel ne possa nia unì strumentalisà per retlam. La lijëndes ie na cumpunënta mpurtanta dla cultura ladina y perchël dëssen ti dé na majera denità culturela” sorissea Roland Verrra. Cun la publicazion didatica “Lijëndes y cianties” uelen sensibilisé de chësc vieres.
Gran mpurtanza al mantenimënt y ala valorisazion dla lijëndes ladines dà nce l assessëur provinziel Florian Mussner: “La lijëndes conta truep de nosta cultura y tradizion, l me fej perchël gran legrëza sce cun l aiut de material didatich nuef vëniel dat inant chësta gran arpejon culturela ala generazions che vën do”. Cialan inant ti ani devënta l valor de n liber per la scoles mo majer, à juntà l assessëur ladin.
Pra la prejentazion dl liber n sada, 29 de nuvëmber tla cësa provinziela Widmann a Bulsan y la juebia dant a Al Plan, an nce pudù audì la cianties sun la lijëndes. L cor “Pici ciantadus de Al Plan” cun Inge Ties y Herta Feicher à ciantà sun la meludies dl tlavier sunà da Ulrich Willeit. Susy Rottonara à purtà dant vel pez lirich deberieda cun l autor dl liber, Fonjo Willeit. Stories y pensieres sun l mond dla lijëndes ladines ie tla doi prejentazions unides purtedes dant da Christian Ferdigg.
La sensibilisazion per ti dé na majera denità ala lijëndes ladines va inant te chëla che la publicazion vën spartida ora tla scoles ladines. De ndut iel unì stampà 800 copies y nteressei possa se damandé n liber tla Ntendënza per la Scoles Ladines a Bulsan (tel 0471-417000). Tl daunì ulëssen jì inant cun la sensibilisazion metan a jì velch n cont de mujiga y lijëndes.
as
Galaria dales fotografies
(Foto USP/Grossrubatscher)
