Atualità
Analisa di ejams de matura dal 2004 al 2007
USP – L’analisa di ejams de matura à mustrà su na tendënza valiva danter la scoles dla trëi grupes de rujeneda tla Provinzia de Bulsan. Chësc ie unì ora da n lëur fat dai servijes de evaluazion dla rujeneda tudëscia, taliana y ladina. I resultac dl’analisa ie unic prejentei da Rosa Maria Mussner, Bernard Hölzl y Francesco Magno te n cudejel.
La defrënzia danter la grupes de rujeneda n cont dla media de notes dl ejam per finé via la scoles autes ie de n sëul pont. Sibe tla scoles tudësces, che tla talianes y tla ladines ie la media dla notes dla matura dal 2004 al 2007 for stata tl mez dessot dla scala. Paredlan la scoles dla Provinzia de Bulsan cun l’autra pert dla Talia vëijen che da nëus vën i 100 ponc dai ora l manco de dlonch. La medema cossa vel nce per la mëndra valutazion di 60 ponc. Tl Südtirol vën la majer pert di ejams de matura finei via cun na valutazion danter 71 nchin a 80 ponc, a livel naziunel se gëura la spana dla majera cumpëida danter i 61 y 70 ponc. La cumpëida de chëi che passa l ejam ie do la rata drët auta y fej ora l 95% di candidac.
La cumpëides plu avisa ie unides publichedes tl cudejel dal titul “I ejams de maduranza tla scoles autes dl Südtirol dal 2004 al 2007” laurà ora da Bernard Hölzl, Francesco Magno y Rosa Maria Mussner. Tla prima pert vën i resultac di ejams analisei do la grupes de rujeneda y pona vëniel paredlà la scoles dla trëi rujenedes. I ejams vën nce valutei permez al’autra pert dla Talia y rejons tudësces y dl’Austria. L studi mostra su valutazions de mpurtanza per chi che muessa tò dezijions a livel politich, a livel de direzion y programazion dla scola.
Nteressei a chësta analisa, giapa l cudejel tla sëntes dla trëi ntendënzes ala scoles, a Bulsan.
as
