Atualità
Dé internazional dl lingaz dla uma 21 de forà 2009: Mussner
“Le lingaz dla uma é üna dles arpejuns plü stersces dla porsona, al à raîsc che ne mör nia fora, gnanca sce na porsona se trasferësc te n ater paîsc”, scri l’assessur ladin Florian Mussner en ocajiun dl dé internazional dl lingaz dla uma. Le lingaz dla uma cun chël che an à imparè da ti dè espresciun ales prömes descovertes sön le tru dla vita devënta na unité cun la porsona instëssa che ne despartësc nia plü le pinsier dal lingaz.
“Al svilup dl lingaz di pici mituns y dles pices mitans dess i geniturs ti dè na gran importanza”, scri l’assessur Mussner te so comunicat. La capacité de comunicaziun y de pinsier se svilupëia tres le lingaz. Inće por chësc à i pröms agn de vita tan na gran importanza.
La realté de nostes valades ladines se deura bele adora inće ai atri lingac provinziai y al vëgn fat de gran sforc da ti portè pormez la conoscënza di atri lingac bele dala scolina insö. “Cun i resultać ch’i arjunjun spo a vigne livel scolastich tles valades ladines podunse se lascè odëi, suradöt sc’i conscidrun la competënza globala deplü co la soma de sües perts”, mina l’assessur Mussner. Dötes les istituziuns ladines fej vari de cualité por miorè tres deplü l’acompagnamënt y la valutaziun dl imparè i lingac.
Mo pro döt chësc sforz messunse sambëgn se recordè de nosc lingaz ladin che se dà le status de mendranza. Les families à de chësc vers la pröma responsabilité da dè inant nosc lingaz, les istituziuns po dedô l’insigné inant y le renforzè, mo al ê ri sc’al mëss gnì insigné sciöche lingaz forest.
Inće por le turism à le lingaz na gran importanza sciöche elemënt cultural che caraterisëia l’unicité de nosc raiun ladin. La poscibilité da imparè le lingaz ladin inće da pert de nia-ladins dess gnì slariada fora deplü, propi deache al é deplü jënt che se le damana. N bun ejëmpl de chësc vers po gnì dè dales scores defora dal raiun ladin che pita cursc de lingaz por studënć, suradöt di paîsc vijins.
“Tl ćiamp dla cultura ladina gnaràl sostignì particolarmënter i proieć che à sciöche fin chël de renforzè y svilupé le lingaz a livei desvalis de süa espresciun””, stlüj jö l’assessur provinzial Florian Mussner.
USP
