Atualità
Contra radicalism y viulënza tl’Aules
USP – L’edizion nueva dla revista dla scola ladina "Aules" ie dedicheda al argumënt "Contra radicalism y viulënza". Chësta plata che vën spartida ora a duc i nsenianc dla scoles y scolines ladines ie nce da giapé tla Ntendënza Ladina a Bulsan.
L tema de chëst'iede ie dassënn mpurtant dal pont de ududa educatif, davia che l se dà ju cun n problem bendebo’ sentì te nosta cumunanza. “L ne vën nia me jit ite sun la formes plu eclatantes de radicalism y viulënza, ma nce te fenomens nueves coche per ejëmpl l mobbing, l bullying ti media nueves, l’imigrazion y formes de devianza danter i jëuni y si prevenzion” spiega l ntendënt Roland Verra. L’edizion nueva de “Aules” se dà ju cun problems dla valutazion, dl cumpurtamënt, dl’educazion ala legalità y dl’educazion n generel tl dialogh danter sculeies, nsenianc y genitores.
L ne mancia nia l’autra sezions tradiziuneles de chësta revista, chëla dedicheda ai servijes per la scola, chëla sun i proiec y l’ativiteies dla scoles nstësses y chëla dla nfurmazions y rezenscions sun publicazions de nteres educatif.
La revista metuda a jì dala Ntendënza Ladina y dal Istitut Pedagogich Ladin vif coche for dl cuntribut sibe dla scoles nstësses che dla istituzions che ie metudes a secudì y cunsië nosc model scolastich.
as
