Atualità
Reprejentanc di sculeies rejona de dërc y proiec a Roma
USP – I presidënc dla cunsultes di studënc de duta la Talia se à i dis passei ancuntà a Roma. Danter chisc fovel nce Renè Pescoll per la grupa de rujeneda ladina che à fat pea n program rich de ancuntedes, rujenan danterauter nce cun l minister Mariastella Gelmini.
Deberieda à i presidënc dla cunsultes de duta la provinzies purtà dant chël che i se mbincia y damanda dal Minister per l’istruzion. Tl’ancunteda tla biblioteca dl Senat à l Minister Gelmini mustrà gran nteres y à nce laudà l’argumentazions sotes di jëuni. Ëila à pona mpermetù de ti cialé plu avisa ala prupostes di studënc. Tl Senat ie nce stata l’ancunteda cun la cumiscions parlamenteres per la criminialità urganiseda, per la cultura, scienzes y furmazion. I reprejentanc di sculeies à nce damandà do ciuni che sarà i proscimi argumënc che l unirà tratà n cont dla scola.
Sëuraprò al’ancuntedes cun la politica, iel nce stat barac cun urganisazions coletives. L ie unì rujenà cun “Save the Children” che porta inant i dërc di mëndri y di sculeies. A Roma iel pona nce stat ucajion de purté dant l proiet dla “Cherta di sculeies” che dëssa pité de miëur priejes ai sculeies per jì al chino, a teater, ti museums y mo te d’autra istituzions cultureles. Proscimamënter unirà la “Cherta di sculeies” nce data ora ai sculeies tl Südtirol.
La "Robert F. Kennedy Foundation of Europe" à dat ora n cudejel per dé inant l argumënt di dërc dla persona a livel scolastich. A Roma iel nce unì prejentà l cuncors "Educarsi al futuro" per sensibilisé i jëuni n cont de energia alternativa y formes de energia tl’terzo mond.
as
