Atualità
Ladina y Rumantschia deberieda tl internet
USP - Danter la Ladinia y la Rumantschia iel unì metù a jì n cuntat nuef, n fil culturel che dëssa tres internet judé a svilupé cuntac danter i doi raions dala medema ravises. La plata internet Filcultural.info prejënta la doi realteies, mostra paraleles y pieta ucajion de paredlé.
Per l prim iede vëniel prejentà la valedes ladines dla Dolomites y la valedes rumances di Grijons deberieda tl internet. L fin prinzipel ie chël de dé nfurmazion sibe ala doi grupes de rujeneda mparentedes, che nce ai nteressei de rujeneda tudëscia, taliana y nglëija. “Na plata internet fata te cin rujenedes ie na gran richëza che spidlea nce la vita de nosta jënt cun de plu rujenedes y cun si particulariteies” sorissea l assessëur ladin Florian Mussner.
La plata internet Filcultural.info ie mpartida te ot categuries. Ala prejentazion di ladins y di rumanc ie dedichedes la pertes sun la cultura, geografia y storia. Te uni categuria vëniel prejentà la situazion tla doi realiteies. La storia linguistica ie per tramedoi la medema, la storia cumporta la ravises deberieda che lieia i doi raions.
I doi ufizies culturei, chël dla Provinizia de Bulsan y chël dla Promoziun da Linguas dl Chantun Grischun che à laurà ora l proiet, à nce dedicà capituli ala pert aministrativa. L vën prejënta l servisc publich (situazion iuridica, aministrazion y scola), i media de rujeneda ladina y rumancia, i comunicac dl ufize stampa provinziel per ladin, links y cuntac.
“Chësta plata internet juda a mëter a jì y sustenì cuntac danter Ladins y Grijons” se ncunforta l assessëur ladin. “Propi nce te chësc cajo ne cunësc la cultura deguna sëides”. Tla Dolomites ons feter 38.000 Ladins y ti Grijons iel passa 34.000 Rumanc, l “Fil cultural” ie n var inant per nuzé sinergies.
“Lauré mo inant sun chësta plata internet ne ie nia tan scëmpl, l tleca pensé che ulon prejenté i cuntenuc te cin rujenedes” spiega Barbara Perathoner dl Ufize provinziel per la cultura ladina. L svilup tecnich dla prejentazion internet cun vel traduzion sëuraprò à custà 20.900 Euro y ie unì finanzià dal fond “Interreg IIIA” dla Union Europea. Filcultural ie na esprescion adurveda sibe dai Ladins che dai Rumanc per mustré su l fil che lieia la doi grupes de rujeneda dal pont de ududa culturel.
Link www.filcultural.info
as
