Atualità
Sculeies de Sëlva per la segurëza sun la nëif
USP – I sculeies de Sëlva ie ncuei (24 merz) sun Plan de Gralba per n di dedicà ala segurëza sun la nëif. Deberieda cun de plu lies y istituzions vëniel nsenià ai mëndri ciuni che ie i periculi dl sport sun la nëif y co che n possa i astilé ora. L assessëur Florian Mussner sorissea la mpurtanza de chësc di de nseniamënt che vën metù a jì per l prim iede.
La mutans y i mutons dai 10 ai 14 ani cumporta la grupa de persones che se fej plu suvënz mel ti sporc da inviern. N di de prevenzion ulache i sculeies possa mparé a cunëscer i periculi y co i astilé ora ie de gran mpurtanza. La lia per la segurëza de mutons y jëuni à nsci nvià via per l prim iede di de nseniamënt per i sculeies de Sëlva sun Plan de Gralba. Fat pea à tlo feter 130 sculeies dla prima tlas dla scola mesana cun la cuarta y cuinta tlasses dla scola elementera. Te sies stazions iel unì prejentà y mustrà regules y manieres de sucors: danora à i maestri dla Scola di sci spiegà la mpurtanza dl se sciaudé ite y dl material; i Judacrëp à prejentà l servisc di cians da levina y co che n adrova la sondes y l pieps n cajo de na levina. Deberieda cun si nsenianc à i sculeies, spartii te de plu grupes nce mparà a cunëscer l lëur de prim aiut cun l akja, prejentà dala Crëusc Blancia, l respet per la natura cun la Stazion dla Forestela y la regules sun purtoi da pert di Carabinieri. Gran nteres iel daniëura per l’Aiut Alpin che à nce mustrà co che l vën fat n ntervënt de prim aiut cun l joler.
“La furmazion fata sun l post ie de gran valor y la sensibilisazion di sculeies n cont dl cumpurtamënt per si segurëza y chëla di autri garata cun de tel scumenciadives dessegur miec” à sorissà l assessëur ala scola ladina Florian Mussner.
as
