Atualità
La cultura y scola ladina se prejënta tl’internet
USP – Chisc dis ie jites online la plates internet nueves dla Repartizion provinziela per la Cultura y Intendënza ladina. Sota l’adres www.provinzia.bz.it/ntendenza-ladina vëniel prejentà te trëi rujenedes la istituzion cun servijes, proiec y cuntac da pert dla Provinzia de Bulsan per la Cultura y scola ladina. Tres l cialé ora y la partizion nueva vëniel dat truepa nfurmazions che unirà do y do atualisedes.
Aldò l cunzet dla nueva plates internet dla Repartizion dla Ntendënza y Cultura ladina vëniel dat duta la nfurmazions de utl a na maniera che nteressei se muessa nia riesc cherdé su o mandé e.mails. Tenian cont dla corporate identity dla Provinzia iel nce unì fat n lay out per se abiné plu saurì i ponc de nteres.
La plates internet ie partides te scola y cultura ladina, y tramedoi pertes prejënta cater capituli prinzipei. La Intendënza prejënta la scola nstës, na pert per studënc, una per nsenianc y una di proiec de scola. “Tlo ons nce vel mendra nuvità y pona uniral do y do leprò publicazion, proiec de scola y nuviteies” spiega Karl Demetz che ti ie stat do al renuvamënt dla plates. La nueva plates internet mostra su tan grant y cumples che ie l mond dla scola cun truep ciamps, l tleca tlo cialé a tan de cunsultes y servijes che la scola pieta.
I cater ponc dla Cultura ladina ie la cultura nstëssa, manifestazions, cuntribuc-formuleres y ënc-lies. Da nuef iel che sun la plates provinzieles vëniel nce prejentà aspec culturei, storics y de rujeneda che possa nteressé i ladins nstësc y jënt d’autra cultures. Ciche ne fova mo nia sun la verscion da dant, ie na fotografia di catalogs di artisć ladins che ie unic sustenii dala Provinzia. “Dajon nce la puscibltà de prejentazion a duta la lies cultureles, ëi possa mandé ite fotos o link a si website” dij Barbara Peratoner dl Ufize per la Cultura Ladina.
La plata internet ie per l assessëur Florian Mussner n mesun per dé inant nfurmazion a nosta populazion y nce a chëi che vif te d’autri raions sun dut l mond. “Te n tëmp ulache dut va debota iel mpurtant che n giapa la nfurmazions al mumënt y nsci nfurmazions atueles. La nueva plates internet ie n arichimënt nfurmatif y nce de rujeneda” dij l assessëur provinziel ladin.
“Te nosc cajo ie l lëur y mpëni stat dassënn grant permez a d’autra repartizions ajache dut l cuntenut vën prejentà te trëi rujenedes” dij l ntendënt Roland Verra. “La plates ne ie nia finedes, ulon for inò junté cuntenuc nueves y atualisazions tenian nce cont di cunsëies che nes vën da publich”.
L servisc che la Repartizion provinziela per la Scola y cultura ladina pieta, tan granda che ie la istituzion y cie che taca dut leprò posse udëi tl internet al link www.provinzia.bz.it/ntendenza-ladina.
as
