Atualità
Sculeies de S.Crestina prejënta la CD „Supermegafesta“
USP – La legrëza de cianté y de fé mujiga di sculeies dla scola elementera de S.Crestina ne n ie nia da fermé: te n proiet scolastich iel unì tëut su per l prim iede na CD cun cianties de cuntenut educatif y da plajëi, beles da scuté su per duta la familia. Pra la prejentazion ai 17 y 18 de auril a S.Crestina saral nce da udëi bai, n spetacul cun dia y nchinamei video clips. Cumpran la CD dal titul „Supermegafesta“ juden n proiet umaniter dla Caritas.
La 10 cianties dla CD nueva ie unides scrites per jì a urëdla a granc y pitli. L ie pec da rì, ma nce pec che fej muever la fantajia, che fej pensé do y che nsënia. 71 sculeies danter la terza elementera y la terza mesana cianta dl strité y ciafië y de Die che ie danter nëus. La maestres Heidi y Margot Insam deberieda cun Thomas Kostner à nstës scrit i tesc’ y la meludies. Bele dan 10 ani ova ëi scumencià cun l cor dla scola elementera a S.Cristina. L’armunia danter i sculeies y la legrëza de fé mujiga ai śën ulù dé inant ala families a cësa y a duc canc tulan su na CD. „Nosc motto ie ‘Dut cie che conta ie la legrëza de cianté‘ y per chësc se ons tëut su l lëur y n l mpëni“ conta la maestra Heidi Insam. L Cor di sculeies de S.Cristina ie unì cumpanià da 8 sunadëures cun chitares, keyboard, percuscion, vidula y flaut. Mutans y mutons dai 8 ai 14 ani cianta, cun nglëisc y spanuel, de ndut te cin rujenedes. Na particularità ie che sun la CD ne iel (ora de de doi pec rap) nia da audì pec ciantei da ujes singules. „On ulù lascé cianté pea duc zënza auzé ora chëi che ie plu adatei“ spiega l maester Thomas Kostner.
Spetacul de prejentazion
La CD „Supermegafesta“ unirà prejenteda n vënderdi ai 17 de auril dala 17.30 y l di do, ai 18, dala 20.00 tla sala de chemun a S.Cristina. L sarà da udëi n spetacul cun bai y chedri a culëures, che dëssa dé inant la legrëza de cianté. Per trëi cianties iel nchinamei unì fat n video clip. La ntreda ala doi sëires ie debant, purempò adroven chertes de ntreda che vën dates ora tla Cassa Raiffeisen a S.Crestina.
Per la proves de cianté, proves de bal, registrazions dla cianties y di video cun dut l mëter a jì, ne à nia bastà l’ëures opzioneles de scola y nscì an sëuraprò nce tëut ca l tëmp liede. N valor dla CD va de cër viers nce sëura l nseniamënt scolastich ora , te chëla che l vën sustenì n proiet dla Caritas per mutons tla Bolivia. Cun na dunfierta de 12 Euro giaten la CD „Supermegafesta“ y juda n nternat per mutans y mutons che vën dai pitli luesc dla Bolivia ulache l ne ie deguna scoles. „Sëuraprò ala legrëza de cianté judons nce d’autri sculeies“ dij la maestra Margot Insam, „De valor ie nce che da d’ëi pudons mparé che n possa vester cuntënc cun scialdi manco avëi“. La CD di sculeies de S.Crestina sarà da giapé tla butëighes Delago Libri a Urtijëi, da Maciaconi a S.Crestina y tla Cassa Raiffeisen te Sëlva. L proiet dla Scola elementera de S.Crestina ie nce prejentà tl internet, sun la plates „www.grundschule4u.it“.
as
Galaria dales fotografies
