Atualità
De plu iscrizions ala scoles ladines
USP - Per l ann de scola che vën se à tla scoles ladines scrit ite de plu sculeies permez al ann passà. Danter scolines, scoles de ublianza y scoles autes tla Val Badia y te Gherdëina, se à scrit ite 25 sculeies de plu. L pitl aumënt mostra su na situazion stabila tla doi valedes ladines. Per l ann de scola 2009/10 se à scrit ite de ndut 3.315 sculeies.
Tla 17 scolines dla Val Badia y de Gherdëina se à per l proscimo ann de scola scrit ite 726 mutans y mutons. Chësc ie 7 mëndri de plu permez al ann passà. Tla scoles de ublianza iel per n auter ann 1.384 sculeies tl’elementera y 826 tla mesana. Paredlan al ann passà iel avisa 23 sculeies de manco tla scola elementera y 23 de plu tla scola mesana.
Tla scoles autes a La Ila y a Urtijëi ie la cumpëida dl’iscrizions jita su dl 5%. Da 361 sculeies da chëst ann ruveran d’autonn a de ndut 379 sculeies. “Chësta zifra possa unì nterpreteda sciche cunseguënza positiva di sforc de nosta scoles autes per ti pité prupostes nueves a nosc jëuni” dij l ntendënt Roland Verra. Da nuef sarà d’autonn na furmazion de carater pedagogich tla scoles autes da La Ila y tl ITC Raetia de Urtijëi vëniel per l terzo ann ndolauter pità la sezion dl sport. Tla scola d’Ert Cademia a Urtijëi vëniel laurà per mëter a jì na sezion de mujiga che dëssa pona mëter man cun l ann de scola 2010/2011.
La aumënt dla cumpëida de iscrizions fej nce plajëi al assessëur provinziel ala scola ladina Florian Mussner. “Dantaldut tla scoles autes ie l aumënt n sëni che diretëures y nsenianc tën l var cun l’esigënzes de nosc tëmps”.
as
