Atualità
Regions a una per i mediatëures culturei
USP – La cundizions acioche vëniel recunesciuda la figura prufesciunela de mediatëures culturei ie unides nviedes via n vënderdi (17 auril) tla cunferënza dla regions a Roma. “Chësc ie n var mpurtant de vies dl recunescimënt y nce n cont de valorisé chël che i mediatëures culturei fej per la ntegrazion tlo da nëus” dij l’assessëura provinziela Barbara Repetto.
L muvimënt mundiel che devënta for majer y la migrazions che vën a se l dé se damanda persones y istituzions che nvieia via “puenc” danter la cultures. “Propi te chësc ciamp - n cont de barat, sensibilisazion y promozion dl dialogh – se à i mediatëures culturei bele dai ani fat meric” dij Repetto.
Nce tl Südtirol an udù i suzesc di mediatëures che à judà la ntegrazion de migranc. “La Provinzia de Bulsan ie n model te chësc ciamp y perchël ti iel nce unì dat la direzion canche la se à tratà de mëter ju pertendudes y cundizions per detlaré la figura prufesciunela” spiega l’assessëura. Chësc duvier se a sëurantëut la repartizion provinziela de furmazion prufesciunela tla rujeneda taliana. Si pruposta ie n vënderdi unida azeteda tla cunferënza dla regions a Roma.
“Śën vala de purté dant al minister talian de cumpetënza la dumandes dla regions n cont dla recunescimënt di mediatëures culturei” dij Repetto. “La se trata dantaprima de marciadé cun l minister per cuestions nternes y l minister per l lëur y la furmazion”. L fin de chësta tratatives ie l recunescimënt a livel naziunel di mediatëures culturei.
L documënt dat pro dala regions n cont dla pertendudes y cundizions per detlaré la figura prufesciunela ie publicà tl internet sota www.regioni.it/newsletter/newsletter.asp?newsletter_data=2009-04-16&newsletter_numero=1349#art4#art4
as
