Atualità
N ëura de plu tl’elementeres ladines
USP – Tla scoles elementeres ladines uniral d’autonn tenì n ëura al’ena de plu. Per la prima tlasses arà la singula scoles alincontra la puscibltà de smendrì l’ëures fajan a chësta maniera la sada liedia. Chëstes ie la majera nuviteies che porta la ndicazions nueves per la scoles elementeres y mesanes tla valedes ladines, dates pro inier, 27 de auril, dal Guviern dla Provinzia de Bulsan.
La majera nuviteies reverda la scola elementera. Dala segonda ala cuinta tlas uniral juntà mo n’ëura de nseniamënt. Per i plu pitli, tla prima tlas iel unì udù dant la puscibltà de tò demez doi ëura. La singula scoles cun si direzion y cunsëi de scola possa tò la dezijion sce fé l prim ann de scola n pue’ plu lesier, partian su duta l’ëures a na maniera che la sada resta liedia. Na particularità per l’elementeres ladines ie doi ëura de materies opzioneles de ublianza. Tlo muessa i sculeies crì ora danter la materies che si scola pieta sëuraprò.
Davia che ntan i ultimi ani iel tla scoles ladines bel unì fat na prova dla reforma scolastica, ne se muda cun la ndicazions nueves nia per la scoles mesanes. La cumpëida dl’ëures de nseniamënt y dla materies opzioneles resta unfat. L unirà dat pëis a ciamps de nseniamënt che reverda de plu materies cun l fin che i sculeies mpere a fé culegamënc. A chësta maniera vëniel nce respetà l’idea de sustenì la individualisazion y personalisazion dl nseniamënt.
La defrënzia permez ala scoles tudësces y talianes ie che tla Val Badia y te Gherdëina vëniel tenì inant l sistem paritetich. La materies unirà nce tl daunì nseniedes o per tudësch, o per talian. Per respeté la medema cumpëida de ëures danter la doi rujenedes iel unì smendrì la cumpëida de materies opzioneles liedies. La rujeneda ladina unirà nce tl daunì nsenieda sciche materia y mplu adurveda sciche rujeneda de aiut per l nseniamënt n generel.
Passa 20 ani oven ciafià cun la ndicazions da dat. L documënt dat pro dai assessëures provinziei muessa śën mo giapé l bensté dal minister a Roma y pona puderal de setëmber jì n drova cun l ann de scola nuef. Sciche basa dla ndicazions nueves iel unì tëut ca chël che l ie unì laurà ora per la scoles tudësces de nosta provinzia. “I coleghes tudësc à fat n bon lëur trajan nce ite de plu prufessëures y à giapà l’azetanza da Roma. Perchël ons per la scola ladina me plu fat adatamënc” spiega l ntendënt Roland Verra. Doi grupes de lëur à laurà ora y ntegrà la prupostes che ie unides dai nsenianc ladins nstësc.
as
