Atualità
Grijons y furlans anconta l model scolastich ladin
USP – L nteres per l model dla scola paritetica ladina devënta for majer. N juebia 7 de mei se anconta delegazions de studënc dai Grijons y dal Friul cun l assessëur Mussner y n ntendënt Verra a Bulsan per mparé a cunëscer l model dla scoles ladines.
Studënc de pedagogia Grijons y studënc de n master de nseniamënt de ladin dl’Università de Unidin se anconta cun reprejentanc dla scola ladina a Bulsan. L assessëur provinziel Florian Mussner y l ntendënt Roland Verra prejenterà l model scolastich tla valedes ladines, stizà sun l nseniamënt dla trëi rujenedes provinzieles y sëuraprò rujenedes fulestieres. L’ancunteda, n juebia ai 7 de mei, scumëncia dala trëi domesdì tla cësa provinziela Widmann.
La doi delegazions vijiterà nce la scoles y scolines ladines tl cheder de si furmazion per renfurzé i cuntac cun i sistems scolastics ujins tla Elpes. La delegazion de studënc grijons vën acumpanieda dal prufessëur. Werner Carigiet dla scola auta ciantunala de Coira. La grupa de universiteres furlans, che per la gran pert ie nstësc bele nsenianc de ladin, vën meneda dala prufessëura Alessandra Burelli dla Università de Udin.
“L fej plajëi che ultimamënter iel n gran nteres per nosc model scolastich da pert de plu studiëusc da oradecà y mo deplù che te chësc cajo, vëniel a sel dé na ancunteda de jënt de scola de duc i trëi raions ladins dla Elpes” sorissea l ntendënt Roland Verra.
as
