Atualità

Scora / Cultura | 08.05.2009 | 09:25

Grijons y Furlans mostra nteres per la scola ladina

USP – Na delegazion de studënc rumanc dai Grijons dla Svizra anconta chisc dis la scola ladina. Tla Cësa provinziela Widmann a Bulsan à l assessëur Mussner y l ntendënt Verra inier juebia (7 mei) prejentà ravises y situazion atuela de nosta scola paritetica.

Studënc grijons à mparà a cunëscer l model dla scola paritetica ladina; foto USP/Pertl.

Trëi tlasses dla scola auta ciantunala de Coira ie unides dai Grijons per n cuntat persunel cun la scola ladina. “La culaburazion y l barat danter l mond dla scola à nce miurà l cuntat interladin” à sorissà l assessëur provinziel Florian Mussner. L studië la ravises interladines ti trëi raions ladins dl’Elpes cumporta n madurì de na identificazion plu sterscia cun nosc vester na mendranza. “Chësta indentificazion ie na seva mpurtanza per se deriejer tla vita” ti à l assessëur metù a cuer ai studënc.

 

La delegazion rumancia, cumpanieda dai prufessëures Werner Carigiet y Ciasper Pult se à bele n struf dat ju cun la scola ladina tla Provinzia de Bulsan. L ntendënt Roland Verra à dat respostes ala dumandes che i studënc ova bele mandà danora. Gran nteres à i Rumanc mustrà per co che ie unì a se l dé la scola paritetica. Marueia ti à fat a udëi co che ti tëmps danter la doi gran vieres univel nsenià feter dut per tudësch, ntan l fascism dut per talian y pona inò per l tudësch. La soluzion de tenscions cun n model scolastich che tën l balanz danter talian y tudësch ie pona unì a se l dé l ann 1948. Aldidancuei ie la scola paritetica deventeda n model per duta l’Europa. Ntres particuler iel nce unì mustrà per la situazion de spartizion di ladins dla Dolomites te doi regions y trëi provinzies. Sce tla Provinzia de Trënt ie permò da feter 10 ani che te scola vëniel tenì cont dla realtà ladina, pona ne iel tla provinzia de Belun deguna regulamentazion autonoma dla scoles per i ladins.
 
La delegazion dai Grijons vijiterà duman sada l’univestità a Persenon cun ntres particuler per la furmazion di maestri per la scoles ladines. Tl ancunteda a Bulsan dla de jënt de scola de duc i trëi raions ladins dla Elpes à mancià la delegazion dal Friul. La grupa de universiteres furlans, che per la gran pert ie nstësc bele nsenianc de ladin ie n juebia stai a vijité la scoles a La Ila. A passé l jëuf ai abù dificulteies sun streda y ne à nsci nia plu pudù ruvé per tëmp a Bulsan. Danter la doi delegazions de studënc iel chisc dis purempò cresciù n liam y la cuscienza de fé pert de n mont ladin spartì sun trëi raions dl’Elpes.

as

Galaria dales fotografies

Studënc grijons à mparà a cunëscer l model dla scola paritetica ladina; foto USP/Pertl.

D'autri comunicac de chësta categuria