Atualità
Locai nueves per cultura y identità te Sëlva
USP - Te Sëlva iel unì giaurì locai nueves dl Istitut Culturel Ladin y dla Bibliotech. Dala culaburazion dla istituzions nasc n zënter culturel te Sëlva per dé forza al identità ladina. L assessëur provinziel Florian Mussner y l ambolt Roland Demetz à n sada (9 mei) giaurì ufizialmënter chësta sënta de culaburazion culturela. Te chësta ucajion ie nce unì prejentà la plata internet dla mostra “Viac tla Ladinia”.
“La pert scientifica y la cultura populera possa te chësta sënta nueva se ancunté y lauré deberieda” cun chësc pensier à l assessëur ladin Florian Mussner mbincià n bon lëur ai culaburadëures dl Istitut y dla Bibliotech ti locai nueves. La prejënza de truep zitadins y de truepa autoriteies à mustrà l gran nteres per chësc zënter culturel te Sëlva. L Istitut culturel Ladin “Micurà de Rü” à giapà ufizies nueves y si sezion linguistica y lessicografica ie unida metuda adum cun i locai nueves dla Bibliotech “Oswald von Wolkenstein”. Per l Servisc de furmazion ie nce n local per tenì cursc de rujeneda. L ambolt de Sëlva Roland Demetz à rujenà de nvestimënt n cont de nosta identità, n valor che vën for de plu nce prieja dal turism tla valeda. “Śën se tratela de jì inant y realisé nce ora dl tublà da Nives na luegia de cultura”.
La bibliotech y la sezion linguistica dl Istitut arjonj te si vester dut un, trëi fins: l ie na luegia de svilup, de cura y de mëter n pratica la cultura ladina. L diretëur dl Istitut Leander Moroder à laudà l nvestimënt dl Chemun dijan che sce te n luech sciche Sëlva te chël che belau duc vif dl turism vëniel dat pëis ala cultura y identità, desmostra chësc che n se rënd cont che nosc vester ie bën de plu che l mpëni economich.
N ucajion dla giaurida di locai nueves iel nce unì prejentà l portal internet nuef te cater rujenedes: ladin, talian, tudësch y nglëisc “Viac tla Ladinia” (www.dolomitesladines.it), che va a una cun la mostra. N portal modern, nfurmatif, che pieta n cheder ampl y tler sun l mond ladin de n iede, ma dantaldut de nosc tëmps, cun truepa tematiches storiches y atueles. Cun chësc mesun multimediel cëlen de jì ancontra a chëi da oradecà, ma zënza desmincë la jënt de nosta valedes. N à pensà dantaldut ai jëuni. N ulëssa propi che ëi se sënt da cësa cun chësc mesun per pudëi se nfurmé sun l mond ladin. La speranza ie che chësta istituzions ruve daujin ala jënt, per se ancunté, per sté deberieda y se sentì da cësa.
as
Galaria dales fotografies
