Atualità
Sculeies ladins unirà premiei ai 19 de mei per lëures letereres
USP – Studënc de duta la valedes ladines se à dat ju cun leteratura y à prejentà lëures de bon livel. La premiazion dl cuncors de leteratura per la scoles ladines “Nos tl dialogh intercultural”, unirà tenida n merdi che vën, 19 de mei, dala 10 danmesdì tla scola auta Raetia a Urtijëi. L cuncors per sculeies ie unì metù a jì dala Ntendënza per la scoles ladines deberieda cun l Istitut Pedagogich Ladin, la Union Generela di Ladins dla Dolomites y i trëi Istituc Ladins de San Martin de Tor, Vich y Col de S. Lizia.
La scumenciadiva dl cuncors de leteratura à l fin de descedé danter i jëuni nteres per l scrì criatif ladin. L ntendënt Roland Verra ova bele nvià via l cuncors per la scoles mesanes y autes de duta la valedes ladines dla Dolomites dan passa diesc ani.
L tema de chëst’ann dedicà a nosc dialogh interculturel ie de valor, tenian cont che la Union Europeica l ova detlarà tema dl ann. Bona ie stata la partezipazion dla scoles mesanes dla valedes ladines y ënghe per la formes multimediales de prejentazion: dala storia curta ala poejia, dal Power Point al film y a d’autra formes mescededes.
Nce la scola auta à dat n bon cuntribut de ideies y de stil, danter l auter cun lëures bëndebò mpeniei sul tema dl cuncors. Sëuraprò a mutivé i jëuni a scrì per ladin, ie l cuncors nce na ucajion de cuntat danter la scoles de duta la valedes ladines. “L cuncors vën tenì uni doi ani y ie una dla scumenciadives tl ciamp leterer y criatif daviertes a dut l raion ladin dla Dolomites” spiega l ntendënt Roland Verra.
La giuria fova metuda adum da n reprejentant de uni una dla Istituzions Ladines che à sustenì l proiet.
Scola mesana
Per la categuria dla scoles mesanes vëniel dat doi prim pesć. Johanna Frenner dla Scola Mesana de Al Plan à venciù cun la storia “Na bela amicizia”, ntan che a 5 sculeies dla Scola Mesana de Urtijëi Aron Senoner, Matteo Bernardi, Giacomo Costanzi, Stefan Cainelli y Thomas Oberkofler à fat n film.
L terzo pest ti ie jit a la sculées Giulia Pedratscher, Caterina Crepaz y Anna Anvidalfarei dla Scola Mesana de La Ila (dla 2 A) cun la storia dal titul “L dé dla müjiga”. Christian Felder, Manuel Crazzolara y Mattia Dapoz dla Scola Mesana da La Ila (dla 2 A) se à tlassificà cuinti deberieda cun Sara Frenademez, Barbara Pezzei y Nadine Miribung dla scola mesana da La Ila (dla 2 C) che à scrit la storia “I ciüfs s’incunta y baia de sües cultures”.
Scola auta
Danter i majeri sculeies, chëi dla scola auta, à venciù Sofia Stuflesser dla prima tlas linguistich-turistica dl ITC de Urtijëi cun n diare poetich drët garatà. L sgondo post ti ie jit a Vanessa Ongari, Ilaria Zulian y Piera Zulian dl Lizeo Scientifich de Poza cun na prejentazion powerpoint. Ruth Malfertheiner dla 4 tlas Scola d’Ert de Urtijëi à scrit 5 poejies y giaperà l terzo pest. Cin poejies à nce scrit Jessica Pitschieler dla 1 tlas IGEA dl ITC Raetia se davanian l cuarto post. Cun na blòta storia se à Matteo Sommariva dl Lizeo Scientifich de Poza (tlas 2 LSA) tlassificà cuinto.
Nce pra i pesć à i urganisadëures tenì cont di fins educatives y nsci uniral pra la premiazion ai 19 de mei, sëurandat bons per cumpré material de scola o libri.
as
