Atualità
Borses de studi per l ann che vën
USP – Chi che studieia tla Talia y oradecà, y respetea i criteries udui dant, possa damandé dala Provinzia de Bulsan cuntribuc per l ann academich 2009/2010. L Guviern provinziel à da permò dat pro l bando de cuncors aldò. Chi che damanda l prim iede na borsa de studi dëssa bele sën se lascé nuté su.
Permez al ann passà iel cun l bando de cuncors uni dat pro vel nuvità. La sëida per l davani ie unida auzeda da 27.000 Euro netto a 29.000 Euro al ann. La borses de studi nstësses ie unides auzedes de trëi percënt cun na soma mascima de 5.700 Euro.
Miuramënc ie nce unì fat n cont dla retuda dla tassa de iscrizion. Da moinla uniral paià ora duta la tassa che i studënc à paià ite nce sota 500 Euro y nce sce i studënc à giapà n reduzion.
Per chëi che studieia tl Südtirol vëniel fat deferënzies aldò dl viac per ruvé tla luegia de studi. A chëi che à la residënza tl luech de studi ti vëniel smëndri la borsa de studi de 60%, chi che ie pendolares me de 30%. Da nuef iel che sciche pendolares vëniel bele cunscidrà cun 10 chilometri de viac y nia sciche dant sëura 30 chilometri.
L bando de cuncors nuef vëija nce dant de nia tò n cunsciderazion l davani dl ann dant per chëi che à perdù l lëur y ie bele da trëi mënsc tla listes di zënza lëur.
La dumandes per borses de studi possa uni mandedes ite al Ufize provinziel per assistënza scolastica, tla streda Andreas Hofer 18 a Bulsan. La dumandes per borses de studi ordineres y straurdineres possa unì dates ju da mez agost nchin ai 3 de nuvëmber 2009.
Chi che fej per l prim iede dumanda, possa bele sën damandé l’iscrizion. Chëstes possen fé tres internet sota www.provinz.bz.it/egov/studienfoerderung
L bando de cuncors y nfurmazions sëuraprò ie da abiné al adres http://www.provinz.bz.it/bildungsfoerderung/
as
