Atualità
Mo 10 dis per de ju lëures per l cuncors artistich
USP – Ai 3 de juni toma l tiermul per dé ju lëures y nsci fé pea l cuncors scrit ora dala Provinzia de Bulsan per artisc' dla valedes ladines. Te chisc ultimi diesc dis possa artisc' ladins de Südtirol, ma nce de Trënt y Belun mandé ite si lëures d’ert.
Tla valedes ladines iel truepa persones che se dà ju cun ert. La Repartizion ala Cultura ladina dla Provinzia de Bulsan à scrit ora n n pest de 15.000 Euro per mutivé a se svilupé inant sun chësta streda. “Chëst iede nvions nce i artisć dla valedes ladines tl’autra doi provinzies” spiega l assessëur provinziel Florian Mussner. Fé pea possa duc i nteressei sëura 18 ani che vif tla cin valedes ladines dla Dolomites. “Ulon cialé sëura la sëides provinzieles ora y nce dé la puscibltà ai artisć de Fascia, Ampëz y Fodom/Col” sorissea l assessëur provinziel ladin Mussner. L pest scrit ora pieta na ucajion ai artisć ladins de se museré danter ëi y nce de giapé na valutazion de si opres da na giuria de esperc.
Nchin ai 3 de juni 2009 (dala 12.00) possel unì dat ju depënc, grafiches, scultures, istalazions, ert conzetuala y n.i. L muessa unì dat ju schizes, dessenieis y material original, unfat sce l’opera ie bele unida realiseda o ie mo da fé. Da junté leprò iel pona nce na descrizion dl’opra artistica cun n curriculum y na documentazion di lëures bele fai.
L argumënt da chëst ann ie ie “Concurs artistich 2009… eroism, inier, incö doman” y fej referimënt al ann comemoratif de 200 ani dala batalia tl Tirol cun Andreas Hofer.
Sëuraprò al pest de 15.000 Euro possa l opra che vënc unì metuda ora tla Galaria Prisma a Bulsan. Aldò dl regulamënt possa l pest nce unì dat ora à doi artisć ex aequo. L pest unirà sëurandat pra na zeremonia ufiziela.
Cun l pest per artisć uelen judé a jì inant cun la gran tradizion artistica dla valedes ladines. “Dai ani iel te nosc luesc unì mustrà gran creatività y n bon livel tl ciamp dl’ert, dessegur nce na esprescion dla Scola d’Ert a Urtijëi. Ulon cun l pest dé na sburdla de mutivazion acioche dantaldut jëuni posse jì inant sun chësta streda” sorissea l assessëur Florian Mussner.
Per la giuria de cin persones, se à dat ca l diretëur dla Scola d’Ert de Urtijëi Karlheinz Mureda, l prufessëura de storia dl’ert Danila Serafini, l artist y espert dla cunsulta tudëscia, Gotthard Bonell, l artist cunesciù dla Val Badia Claus Vittur y la storica d’ert Sabine Gamber.
Nteressei al cuncors per artisć y artistes ladines “Concurs artistich 2009… eroism, inier, incö doman” possa damandé do nfurmazions plu avisa tl Ufize provinziel per la cultura ladina a Bulsan (tel. 0471-417020). L bando dl cuncors ie nce publicà sun internet, al adres http://www.provincia.bz.it/ntendenza-ladina/argumenc/cuncors-artistich-2009.asp
as
