Atualità
Feedback dl’analisa linguistica: ai 5 a S.Martin y ai 10 a Urtijëi
USP – Tla scoles ladines ie unì fat n’evaluazion linguistica di sculeies dla cuinta tlasses elementeres. Deberieda cun esperc dl’Università de Bulsan iel unì analisà la nrescida y paredlà cun sculeies de rujeneda tudëscia y taliana. I resultac de chësta evaluazion scientifica unirà prejentei n vënderdi ai 5 de juni a San Martin de Tor y ai 10 de juni a Urtijëi.
Ntan l ultimo inviern à l Servisc de evaluazion dla scoles ladines fat na nrescida te defrënta cuinta tlasses te Gherdëina y tla Val Badia n cont dla cumpetënza linguistica. Ai sculeies ti iel unì metù dant stories ilustredes che i à pona messù descrì. Dut chësc per ladin, per tudësch y talian. Per pudëi paredlé l livel linguistich di sculeies ladins iel nce unì fat la medema nrescida te cater tlasses de scoles tudësces (a Barbian, Feldthurns y Villanders) y nce la medema cumpëida de tlasses te scoles talianes (Dante Alighieri y Don Milani a Bulsan).
L’evaluazion ie unida fata a livel scientifich cun la culaburazion dla pruf.a Rita Franceschini y la pruf.a Gessica De Angelis dl Zënter de cumpetënza linguistica de Bulsan.
“L ie l prim iede che tla scoles ladines iel unì fat n’evaluazion a livel scientifich universiter per udëi l livel de cumpetënza linguistica de nosc sculeies” spiega Rosmarie Mussner dl Servisc de evaluazion. “I resultac de chësta analisa ie de utl per l urientamënt dl nseniamënt dla rujenedes tla scoles ladines.”
I resultac dl’analisa linguistica de sculeies dla cuinta tlasses elementeres unirà prejentei doi iedesc dala doi prufessurësses dl’Università:
n vënderdi ai 5 de juni
tla sënta dl Istitut Culturel a San Martin de Tor, cun scumenciamënt dala 3 domesdì.
Ai 10 de juni
tl’Aula Magna dla scola elementera de Urtijëi, dala 3 domesdì.
Nviei ie i culaburadëures dla scoles elementeres y mesanes, deberieda cun duc i nteressei.
as
