Atualità
Assessëur Mussner y Ntendënt Verra n cont dla fin dl ann scolastich
L ann de scola 2008/09 ie per finé via. Per l assessëur per la scoles dla valedes ladines Florian Mussner y l Ntendënt Roland Verra iel na ucajion per cialé de reviers al ann de scola passà y rengrazië duta la nseniantes y i nsenianc, ma nce per ti mbincé ala sculées y ai sculeies de bela feries. Dessot iel da liejer l scrit ntier.
"Ala fin dl ann de scola 2008/09 iel na legrezia pudei cunstaté che l se à tratà de n ann positif, plen de scumenciadives ntressantes y cun de bon resultac formatives. Tl ciamp dla scolina iel stat mesun apruvé i Urientamenc Provinziei nueves, che ti dà na nueva dimenscion al leur pedagogich dla scolina y ti geura prospetives ntressantes nia mé tl ciamp plurilinguistich, che caraterisea i progresc de chisc ultimi ani, ma dut nteur de viers de n renuvament contenutistich de chel che nosc mendri possa mé se juvé.
De grà la culaburazion dl personal educatif iel sta puscibl lauré ora deberieda chisc Urientamenc, a na maniera che i venie azetei y purtei pea da duc. L medemo vel nce per la scoles elementeres y mesanes, ulache, do na consultazion lergia, iel sen dan man la Indicazions Provinzieles nueves per la costruzion dl curriculum dla scoles autonomes. Te chesc cajo iel stat mesun meter ite tl document truepa indicazions particuleres per nosc model scolastich, dantaldut n conzet nuef per l nseniament dla rajunda che ti cela al daunì. On creta che chesta indicazions posse unì apruvedes per eura y temp y jì n drova cun la ann de scola nuef.
Da auzé ora ie pona l sforz de renuvament contenutistich che ie unì fat da nosta scoles autes, sibe tl ciamp dla formazion pedagogica, sibe te chel dla puscibiliteies formatives nueves che n uel istituì. Chesc á bele abù na bona resposta da pert dla populazion per chel che reverda la zifres dla iscrizions di sculeies per l ann de scola che ven. Da auzé ora ie nce la bona culaborazion cun duc i organns collegiai dla scola, sibe a livel de Cunsei Scolastich Provinziel, che nce de Consultes Provinzieles di Studenc y di Genitors y duta la istituzions che lëura por nosta scola. L medemo possen dì di cuntac cun la representanzes di direteures y dl personal nseniant y aministratif.
La scola ladina se à merità l recunesciment y l respet nce dl mond academich, che da n cer temp incà à renuvá si ntres de viers dla soluzions didatich-pedagogiches tl raion ladin. Chesc recunesciment nes ie de susteni y cunfort, deberieda cun i bon resultac di ejams de bi- y trilinguism. Rengrazian per dut l leur fat, per la sensibeltà de viers di debujens y dla ghiranzes de nosc sculeies y de nosta families, ulessans auguré n bon finé via dl ann de scola, dantaldut per i resultac scolastics y di ejams, de bela feries y mo truepa legrezia per l daunì."
USP
