Atualità
Assessëur y diretëures ladins cëla tl daunì dla scola
USP – Te n ancunteda danter l assessëur provinziel Florian Mussner y i diretëures dla scoles y scolines ladines iel unì metù sun mëisa i resultac de nrescides n cont dl livel de rujeneda, arjontes y problems de atualità. L assessëur Mussner se damanda plu culaburazion danter scola y istituzions cultureles.
Tl’ancunteda dl 11 de juni à l Ntendënt Roland Verra purtà dant i bon resultac dla nrescida n cont dl scrì per ladin, talian y tudësch tla cuita tlasses dla scoles elementeres, che cunfermea da nuef l valor dl sistem scolastich paritetich di luesc ladins. Daldò al mo purtà dant la arjontes plu mpurtantes y la problematiches atueles de nosc model furmatif.
L Assessëur Florian Mussner à fat na gran lauda ala scolines y scoles ladines, les nvian a lauré inant cun mpëni per i debujens de nosc mëndri y de nosc jëuni. L à auzà ora l debujen de na culaburazion strënta danter la istituzions ladines sibe tl ciamp dla scola che nce dla cultura. Sëuraprò al mo sorissà la mpurtanza dl plurilinguism coche valor pedagogich y l debujen de lauré per na furmazion for plu persunaliseda y individualiseda per l sculé.
Tla senteda tl’ Ntendënza Ladina a Bulsan, à i diretëures à purtà dant i debujens dla istituzions scolastiches y la problematiches plu sentides, dal ajurnamënt ala furmazion, dal calënder de scola ala ntegrazion, dal organich di nsenianc ala assistënza tecnica tl ciamp nfurmatich.
L Assessëur Mussner à respundù, metan l azënt sun si mpëni de sustenì la scolines y scoles ladines tant che l ie mesun te chisc tëmps ulache n muessa tenì cont avisa di mesuns da garat y à mo n iede auzà ora l gran y bon lëur che vën fat da duc i culaburadëures te chësc ciamp determinant per l daunì dla populazion ladina.
as
