Atualità
Culaburazion scolastica danter valedes ladines
USP – Miuré la culaburazion danter valedes ladines tl ciamp dla scola: chësc ie stat argumënt prinzipel dl’ancunteda stata da permò danter reprejentanc dl mond dla cultura y scola ladina da Fedom, Ampëz y la direzion dl Istitut Pedagogich Ladin a Bulsan.
Na culaburazion danter la istituzions scolastiches de Fedom y l Istitut Pedagogich a Bulsan ie bele unida cureda ntan i ultimi ani. “Śën vala da de svilupé inant chësta culaburazion” à sorissa Roland Verra presidënt dl IPL. L assessëur ladin Florian Mussner ova for inò mutivà a na culaburazion plu strënta tl ciamp scolastica danter la valedes ladines.
Tl’ancunteda an de chësc viers tratà proiec cuncrec che n uel realisé proscimamënter.
Da śën inant dëssa nsenianc da Fedom, Col y Ampëz pudëi fé pea duta la vela de cursc y furmazion dl IPL. L material didatich sciche libri y materiai per l nseniamënt laurei ora a Bulsan vën metui a desposizion debant per pudëi i adaté linguisticamënter. Sculeies dl’elementera y dla mesana dëssa mparé a cunëscer miec la valedes ladines fajan jites o barac scolastics. L sentimënt de tuché adum dëssa uni rafurzà cun cuncorsc tl ciamp dla rujeneda ladina. Nscì iel nce unì pensà a na jita culturela de duta la direzions de Gherdëina y Badia per mparé a cunëscer miec la realtà scolastica te Fedom, Col y Ampëz. N cont dla furmazion de maestri iel nce unì fat la pruposta de nvië educadësses dla scolines y nsenianc dla scoles elementeres a fé la facultà de educazion tl’Università a Persenon. A chësta maniera unissel arjont na bona furmazion per nsenië l ladin y na furmazion te de plu rujenedes. Paul Videsott à fat la pruposta de scemplifiché l’ortografia dl idiom fedom a na maniera da mutivé la jënt a scrì nce per fedom.
I reprejentanc da Fedom y Ampëz a prejentà la situazion dl dut nia scëmpla n cont dl nseniamënt ladin te si scoles. Drët ert se fejen a Cortina ajache la direzion scolastica ne mostra nia gran nteres. L finanziamënt de proiec ladins da pert dla Provinzia de Belun ie plutosc dëibli. Per chësta rejons se à i reprejentanc dla valedes ladines tl Belun mustrà dassënn recunescënc per uni aiut a livel de mutivazion y de finanziamënt.
as
